லெபனான் நாட்டில் உள்ள ஐம்பதுக்கும் மேற்பட்ட நகரங்களில் வசிக்கும் மக்கள் உடனடியாக அந்த இடங்களை விட்டு வெளியேற வேண்டும் என்று இஸ்ரேல் இராணுவம் கடும் எச்சரிக்கை விடுத்துள்ளது.பாதுகாப்பு காரணங்களுக்காக இந்த நடவடிக்கை எடுக்கப்பட்டதாக வெளிநாட்டு செய்திகள் தெரிவிக்கின்றன. வெளியேறும் மக்கள், குறித்த நகர எல்லைகளில் இருந்து குறைந்தது ஆயிரம் மீட்டர் தொலைவில் இருக்க வேண்டும் என்றும் அறிவுறுத்தப்பட்டுள்ளது.
ஈரான் மீது இஸ்ரேல் மேற்கொண்ட தாக்குதல்களும், ஹிஸ்புல்லா அமைப்பின் முக்கிய தலைவர்கள் கொல்லப்பட்டதாக கூறப்படும் சம்பவங்களும் பிராந்தியத்தில் பதற்றத்தை அதிகரித்துள்ளன. இதற்கு பதிலடி நடவடிக்கையாக ஹிஸ்புல்லா அமைப்பு இஸ்ரேல் நோக்கி ஏவுகணை மற்றும் ஆளில்லா வான்வழி தாக்குதல்களை நடத்தியதாக தெரிவிக்கப்படுகிறது.இதனைத் தொடர்ந்து, ஹிஸ்புல்லா அமைப்பின் கட்டுப்பாட்டில் உள்ள பெய்ரூத் நகரின் தெற்கு பகுதிகள் உள்ளிட்ட பல இடங்கள் மீது இஸ்ரேல் வான்வழித் தாக்குதல்கள் நடத்தப்பட்டதாக கூறப்படுகிறது.
இது குறித்து இஸ்ரேல் தரப்பு தெரிவித்ததாவது: தமது நாட்டின் பாதுகாப்பிற்கு அச்சுறுத்தலாக இருப்பவர்கள் யாராக இருந்தாலும், அதற்கான விளைவுகளை எதிர்கொள்ள வேண்டியிருக்கும்.லெபனானில் நிலவும் இந்தப் போர் சூழ்நிலை காரணமாக ஆயிரக்கணக்கான மக்கள் தங்கள் வீடுகளை விட்டு இடம்பெயர்ந்து வருகின்றனர்.
