அமெரிக்க விமானப்படையின் முன்னாள் அதிகாரியும், F-35 போர் விமான ஓட்டுநராக பணியாற்றியவருமான ஜெரால்ட் எடி ப்ரவுன் ஜூனியர் (65) இந்தியானா மாநிலத்தில் கைது செய்யப்பட்டுள்ளார். சீன இராணுவ விமான ஓட்டுநர்களுக்கு அனுமதியின்றி பயிற்சி அளித்ததாக அவர்மீது குற்றச்சாட்டு முன்வைக்கப்பட்டுள்ளது.
அமெரிக்க ஆயுத ஏற்றுமதி கட்டுப்பாட்டு சட்டத்தை மீறி, சீன விமானப்படை ஓட்டுநர்களுக்கு போர் விமான பயிற்சி வழங்கியதாக வழக்குப் பதிவு செய்யப்பட்டுள்ளது. 2023 ஆகஸ்ட் மாதத்திலிருந்து அவர் சீன அதிகாரிகளுடன் இணைந்து பயிற்சி திட்டங்களில் ஈடுபட்டதாக விசாரணையில் தெரியவந்துள்ளது.
மேலும், 2023 டிசம்பர் மாதத்தில் சீனாவுக்குச் சென்று பல நாட்கள் அங்குள்ள விமான ஓட்டுநர்களுடன் கலந்துரையாடி, அமெரிக்க விமானப்படை தொடர்பான தகவல்களை பகிர்ந்ததாகவும் தெரிவிக்கப்படுகிறது.அமெரிக்க நீதித்துறை மற்றும் புலனாய்வு அமைப்பினர் இது தேசிய பாதுகாப்பிற்கு மிகப்பெரிய அச்சுறுத்தல் எனக் குறிப்பிட்டுள்ளனர்.
இராணுவத்தில் நீண்டகால அனுபவம் பெற்ற ஒருவர் எதிரி நாடு எனக் கருதப்படும் தரப்புக்கு பயிற்சி வழங்கியிருப்பது மிகவும் கடுமையான குற்றமாகும் என அதிகாரிகள் தெரிவித்துள்ளனர்.ப்ரவுன் 24 ஆண்டுகள் அமெரிக்க விமானப்படையில் பணியாற்றியவர். பல நவீன போர் விமானங்களை இயக்கிய அனுபவம் கொண்ட அவர் மீது சட்ட நடவடிக்கைகள் தீவிரமாக முன்னெடுக்கப்பட்டு வருகின்றன.
