ஆசியா கெப்பிட்டல் மற்றும் ஜப்பானிய முதலீட்டாளர்களுக்கு இடையிலான நீண்ட சர்ச்சை முடிவுக்கு வந்தது.!
ஆசியா கெப்பிட்டல் பிஎல்சி மற்றும் அதன் ஜப்பானிய முதலீட்டாளர்களுக்கு இடையே நீண்டகாலமாக நிலவி வந்த சர்ச்சை, இருதரப்பு உடன்பாட்டின் மூலம் முடிவுக்கு வந்துள்ளது.இதன் மூலம் கடந்த ஐந்து ஆண்டுகளாக நீடித்த சட்டப் போராட்டங்கள், நிறுவன மறுசீரமைப்பு முயற்சிகள் மற்றும் சிக்கலான பேச்சுவார்த்தைகள் நிறைவடைந்துள்ளன.
முன்னதாக, ஆசியா கெப்பிட்டல் நிறுவனத்திற்கு எதிராக ‘சிசி டிரஸ்ட்’ நிறுவனம் தாக்கல் செய்த குற்றவியல் முறைப்பாட்டை, அதிகார வரம்பு காரணங்களால் கோட்டை நீதவான் நீதிமன்றம் தள்ளுபடி செய்தது. இந்த முறைப்பாடு இரண்டாவது முறையாக தள்ளுபடி செய்யப்பட்டதையடுத்து, குற்றச்சாட்டுகள் குறித்து தீர்ப்பு வழங்கப்படாமலேயே சட்ட நடவடிக்கைகள் முடிவுக்கு வந்தன.
இதனைத் தொடர்ந்து, ஆசியா கெப்பிட்டல், சிசி டிரஸ்ட் மற்றும் அதன் பரிந்துரைக்கப்பட்ட ‘டபிள்யூ எஸ் டிரஸ்ட் பிரைவேட் லிமிடெட்’ உள்ளிட்ட ஜப்பானிய முதலீட்டாளர்களுக்கு இடையே சுமூகமான உடன்பாடு எட்டப்பட்டது.இந்த ஒப்பந்தத்தின் படி, ‘ரிவர் ஹவுஸ் பிரைவேட் லிமிடெட்’ நிறுவனத்தில் உள்ள பங்குகளை மாற்றுவதன் மூலம், இரு தரப்புகளுக்குமிடையிலான அனைத்து நிலுவை கடமைகளும் முழுமையாகவும் இறுதியாகவும் தீர்க்கப்படவுள்ளதாக தெரிவிக்கப்பட்டுள்ளது.
