கருப்பை மாற்று அறுவை சிகிச்சை மூலம் பிறந்த முதல் குழந்தை – இங்கிலாந்தில் வரலாற்றுச் சாதனை.!
இங்கிலாந்தில் இறந்த ஒருவரிடமிருந்து தானமாகப் பெறப்பட்ட கருப்பை மாற்று அறுவை சிகிச்சை மூலம் பிறந்த முதல் குழந்தை என்ற சாதனையை ஹ்யூகோ எனும் 10 வார ஆண் குழந்தை படைத்துள்ளது.பிறவியிலேயே கருப்பை இல்லாத குறைபாடு கொண்ட ஒரு பெண், மறைந்த நன்கொடையாளரிடமிருந்து கருப்பை பெற்று இந்த மருத்துவ சாதனையை நிகழ்த்தியுள்ளார். இது மருத்துவ வரலாற்றில் முக்கிய முன்னேற்றமாகக் கருதப்படுகிறது.
2025ஆம் ஆண்டு கிறிஸ்துமஸ் பண்டிகைக்கு முன்பாக, மேற்கு லண்டனில் உள்ள குயீன் சார்லட் மற்றும் செல்சி மருத்துவமனையில் ஹ்யூகோ பிறந்துள்ளார். பிறக்கும் போது சுமார் 3.1 கிலோ எடையுடன் இருந்ததாகவும், தற்போது முழுமையான ஆரோக்கியத்துடன் இருப்பதாகவும் மருத்துவர்கள் தெரிவித்துள்ளனர்.பல தசாப்தங்களாக நடைபெற்றமருத்துவ ஆய்வுகளின் பலனாக இந்த அறுவை சிகிச்சை மேற்கொள்ளப்பட்டதாக கூறப்படுகிறது. இது கருவுறாமை சிக்கல்களை எதிர்கொள்ளும் பல பெண்களுக்கு புதிய நம்பிக்கையை அளித்துள்ளது.
லண்டன் மற்றும் ஆக்ஸ்போர்டு மருத்துவக் குழுக்களின் ஒருங்கிணைந்த முயற்சியால் இந்த கருவுறுத்தல் சிகிச்சை (ஐவிஎஃப்) மற்றும் பிரசவம் சாத்தியமானது.ஏற்கனவே உயிருள்ள உறவினரிடமிருந்து பெறப்பட்ட கருப்பை மூலம் ஒரு குழந்தை பிறந்திருந்தாலும், தற்போது இறந்த நன்கொடையாளரின் கருப்பை மூலம் ஹ்யூகோ பிறந்தது ஒரு முக்கிய மைல்கல்லாகப் பார்க்கப்படுகிறது.
இந்த சாதனை, எதிர்காலத்தில் பாதிக்கப்பட்ட பெண்களுக்கு குழந்தைப் பேறு கிடைப்பதற்கான வாய்ப்புகளை மேலும் உறுதிப்படுத்தும் என மருத்துவ வல்லுநர்கள் தெரிவித்துள்ளனர். மேலும், நன்கொடையாளருக்கும் அவரது குடும்பத்தினருக்கும், மருத்துவக் குழுவினருக்கும் குழந்தையின் தாய் தனது நன்றியைத் தெரிவித்துள்ளதாக கூறப்பட்டுள்ளது.
