இளைஞர் விவகாரங்கள் மற்றும் விளையாட்டுத்துறை அமைச்சு, விளையாட்டுத்துறை அபிவிருத்தித் திணைக்களம் மற்றும் லேக் ஹவுஸ் நிறுவனம் இணைந்து ஏற்பாடு செய்துள்ள ‘லங்கா ரைட்’ சைக்கிள் சவாரியில் இலங்கை வரலாற்றில் மிகப் பெரிய பரிசாக ஒட்டுமொத்த வெற்றியாளருக்கு 600,000 ரூபா பணப்பரிசு வழங்கப்படவுள்ளது.
இந்த சைக்கிளோட்டப் போட்டி எதிர்வரும் ஜனவரி 16 ஆம் திகதி காலை 9 மணிக்கு கொழும்பு, டி.ஆர். விஜேவர்தன மாவத்தை லேக் ஹவுஸ் நிறுவனத்திற்கு முன்னால் ஆரம்பமாகவுள்ளது.லங்கா ரைட்’ சைக்கிளோட்டப் போட்டியின் முதல் தினத்தில் கண்டி சென்று, இரண்டாவது தினத்தில் அநுராபுரத்தில் பூர்த்தி செய்யப்படுவதோடு இறுதி நாளான டிசம்பர் 18 ஆம் திகதி புத்தளம் வீதி ஊடாக டொரின்டன் பிளேஸ் சுதந்திர சதுக்கத்திற்கு அருகே நிறைவடையவுள்ளது.
இதில் முதல் நாள் போட்டி 105.5 கி.மீ. தூரம் கொண்டிருப்பதோடு இரண்டாவது நாள் போட்டி 135.5 கிலோமீற்றர் உடையது. அநுராதபுரத்தில் இருந்து கொழும்பு வரை இடம்பெறும் கடைசி நாள் போட்டி 208 கிலோமீற்றர் கொண்டது.இந்தப் போட்டியில் 26 அணிகள் பங்கேற்பதோடு ஓர் அணியில் குறைந்தது நான்கு மற்றும் அதிகபட்சம் ஆறு வீரர்கள் இடம்பெற்றுள்ளனர்.இதன்படி 150 இற்கும் அதிகமான வீரர்கள் பங்கேற்றுள்ளனர்.
இந்தப் போட்டியில் ஒட்டுமொத்த பரிசுகள் மற்றும் ஏனைய கொடுப்பனவுகள் என 50 இலட்சம் ரூபா வழங்கப்படவுள்ளது.போட்டியின் ஒட்டுமொத்த வெற்றியாளருக்கு 600,000 இலட்சம் ரூபா பரிசும் இரண்டாம் இடம் பிடிப்பவருக்கு 500,000 இலட்சமும் மூன்றாம் இடத்திற்கு 400,000 இலட்சமும் வழங்கப்படும்.
தவிர 4 மற்றும் 5 ஆம் இடங்களை பிடிப்பவர்களுக்கு முறையே 300,000 மற்றும் 200,000 ரூபா பரிசு வழங்கப்படும். போட்டியில் முதல் 25 இடங்களை பிடிப்பவர்கள் வரை பணப் பரிசு அளிக்கப்படவுள்ளது.அத்துடன் விசேட பரிசுகளும் வழங்கப்படும். சிறந்த வேக ஓட்ட வீரர், மலையேற்ற வீரர் ஆகியோருக்கு தலா ஒரு இலட்சம் பணப்பரிசும் 23 வயதுக்கு உட்பட்ட சிறந்த இளம் வீரர் தேர்வு செய்யப்பட்டு 200,000 ரூபா பணப்பரிசும் வழங்கப்படும். சிறந்த அணிக்கும் 200,000 ரூபா பணப்பரிசு வழங்கப்படும்.
இந்தப் போட்டியில் பங்கேற்கும் வீரர்களுக்கான நாளாந்த கொடுப்பனவும் அதிகரிக்கப்பட்டுள்ளது. வழக்கமாக போட்டியில் பங்கேற்கும் வீரர்களுக்கு 2,500 ரூபா வரையிலேயே கொடுப்பனவு வழங்கப்படும் நிலையில் இந்தப் போட்டியில் அந்தத் தொகை 5,000 ஆக அதிகரிக்கப்பட்டுள்ளது.
