மன்னார் நகர சபையின் 2027 ஆம் ஆண்டுக்கான பாதீட்டின் இறுதி வாசிப்பு வியாழக்கிழமை.!

மன்னார் நகர சபையின் 2027 ஆம் ஆண்டுக்கான பாதீட்டின் இறுதி வாசிப்பு மற்றும் இறுதி வாக்கெடுப்பு எதிர்வரும் 12ஆம் திகதி வியாழக்கிழமை காலை 10 மணிக்கு இடம்பெற உள்ளதாக மன்னார் நகர சபையின் தவிசாளர் டானியல் வசந்தன் தெரிவித்தார்.

அவர் மேலும் தெரிவிக்கையில்,
மன்னார் நகர சபையின் 2027 ஆம் ஆண்டுக்கான பாதீட்டின் முதலாவது வாசிப்பு கடந்த மாதம் 20ஆம் திகதி இடம்பெற்றது. இதன் இறுதி வாசிப்பு மற்றும் இறுதி வாக்களிப்பு எதிர்வரும் 12ஆம் திகதி வியாழக்கிழமை காலை 10 மணிக்கு நடைபெறவுள்ளது.

நகர சபையின் சொந்த வருமானமாக 24 கோடி 48 இலட்சத்து 64 ஆயிரம் ரூபாய் கிடைக்கப்பெறுகிறது. கொடைகளாக 8 கோடியே 36 இலட்சத்து 70 ஆயிரத்து 550 ரூபாய் கிடைக்கப்பெறுகிறது. மொத்த வருமானமாக 32 கோடியே 85 இலட்சத்து 34 ஆயிரத்து 980 ரூபாய் காணப்படுகின்றது.

நடைமுறைச் செலவீனங்களுக்காக 22 கோடியே 10 இலட்சத்து 64 ஆயிரத்து 700 ரூபாய் ஒதுக்கப்பட்டுள்ளது. மக்களுக்கான நேரடி அபிவிருத்தி வேலைகளுக்கான ஒதுக்கீடாக மூலதனச் செலவீனம் 10 கோடியே 74 இலட்சத்து 70 ஆயிரம் ரூபாய் ஒதுக்கப்பட்டுள்ளது. பாதீட்டு மீதியாக ர 280 ரூபாய் உள்ளது.

2028 ஆம் ஆண்டுக்குள் மன்னார் நகர சபைக்குட்பட்ட அனைத்து பிரதேசங்களிலும் வீதிகளும் வடிகால்களும் முழுமையாக அமைக்கப்பட வேண்டும் என்ற திட்டமிடலுடன் இவ் மதிப்பீடு உருவாக்கப்பட்டுள்ளது.

மக்களுக்கான அபிவிருத்தி திட்டங்களுக்கு ஒதுக்கப்பட்ட 10 கோடியே 74 இலட்சம் ரூபாவில், ஒற்றை வட்டாரத்திற்கு 74 இலட்சம் ரூபாவும், இரட்டை வட்டாரத்திற்கு 1 கோடியே 40 இலட்சம் ரூபாவும் நிதிப் பங்கீடு செய்து ஒதுக்கீடு செய்யப்பட்டுள்ளது.

கிடைக்கப்பெற்ற 8 கோடி ரூபாய் நிதி ஊடாக, குப்பைகளை மறுசுழற்சி முறையில் அகற்றுவதற்கும், அவற்றைப் பராமரிப்பதற்கும் தேவையான பெரிய இயந்திரங்களைக் கொள்வனவு செய்து குப்பைகளை முறையாக கையாள்வதற்கான திட்டமும் நகர சபையில் முன்னெடுக்கப்பட்டு வருகின்றது.

மக்கள் நலனையும், அபிவிருத்தியையும் கருத்திற்கொண்டே மன்னார் நகர சபை செயற்படுகின்றது என அவர் மேலும் தெரிவித்தார்.