ஹட்டன் வலயக் கல்விப் பணிமனை தற்காலிகமாக ஹட்டனில் தற்போது மூடப்பட்டுள்ள உதவித் தொழில் ஆணையாளர் பணிமனையின் பழைய கட்டடத்திற்கு மாற்றப்படவுள்ளதாக நுவரெலியா மாவட்ட அபிவிருத்திக் குழுத் தலைவரும் பாராளுமன்ற உறுப்பினருமான மஞ்சுள சுரவீர ஆரச்சி தெரிவித்துள்ளார்.
தற்போது இயங்கி வரும் கட்டடத்தில் போதிய இடவசதி இல்லாததாலும், மழை நாட்களில் கட்டடத்தினுள் மழை நீர் கசிவதாலும் பணிகளைத் தடையின்றி முன்னெடுக்க முடியாதுள்ளதாகத் தெரிவித்து, பணிமனையின் அதிகாரிகள் மற்றும் ஊழியர்கள் அண்மையில் பணிமனைக்கு முன்பாக ஆர்ப்பாட்டத்தில் ஈடுபட்டிருந்தனர்.
ஹட்டன் வலயக் கல்விப் பணிமனையின் கீழ் சிங்களம், தமிழ் மொழி மூலமான சுமார் 140 பாடசாலைகள் நிர்வகிக்கப்பட்டு வருவதுடன், அங்கு சுமார் 80 ஊழியர்கள் பணியாற்றி வருகின்றனர்.
கல்விப் பணிமனை தற்காலிகமாகப் பழைய தொழில் ஆணையாளர் கட்டடத்தில் இயங்கவுள்ளதுடன், புதிய கட்டடமொன்றை அமைப்பதற்குப் பொருத்தமான காணி கண்டறியப்பட்ட பின்னர், ஹட்டன் வலயக் கல்விப் பணிமனை உட்பட பல அரச நிறுவனங்களை ஒரே கூரையின் கீழ் இயங்க வைக்கும் வகையில் பல்தேவை கட்டடம் ஒன்றை அமைக்கத் திட்டமிடப்பட்டுள்ளதாக மஞ்சுள சுரவீர ஆரச்சி மேலும் குறிப்பிட்டுள்ளார்.
