உத்தியோகபூர்வ விஜயம் மேற்கொண்டு நியூசிலாந்து சென்றுள்ள இலங்கை வெளிவிவகார அமைச்சர் விஜித ஹேரத், அந்நாட்டு நாடாளுமன்றத்தின் வெளிவிவகாரங்களுக்கான எதிர்க்கட்சிப் பேச்சாளர் வானுஷி வோல்டர்ஸை நேரில் சந்தித்துப் பேச்சு நடத்தியுள்ளார்.
இந்த உயர்நிலைச் சந்திப்பு குறித்துத் தனது உத்தியோகபூர்வ ‘எக்ஸ்’ சமூக வலைத்தளப் பக்கத்தில் பதிவொன்றை இட்டுள்ள இலங்கை வெளிவிவகார அமைச்சர், இருதரப்பு விவகாரங்கள் பலவற்றைப் பற்றி தாங்கள் இருவரும் மிகவும் பயனுள்ள கலந்துரையாடலை மேற்கொண்டதாகக் குறிப்பிட்டுள்ளார்.
இச்சந்திப்பின் போது, இலங்கையின் தற்போதைய அரசியல் முன்னேற்றங்கள் மற்றும் பொருளாதார மறுசீரமைப்புகள் குறித்து நியூசிலாந்து நாடாளுமன்றத்தின் வெளிவிவகாரங்களுக்கான எதிர்க்கட்சிப் பேச்சாளரிடம் அமைச்சர் விஜித ஹேரத் விரிவாக விளக்கியுள்ளார். அத்துடன், இரு நாடுகளுக்கும் இடையிலான வர்த்தக உறவுகளை மேம்படுத்துதல், சுற்றுலாத் துறைக்கான புதிய வழிமுறைகளைக் கண்டறிதல் மற்றும் இலங்கையிலுள்ள பரந்த முதலீட்டு வாய்ப்புகள் குறித்தும் இதன்போது ஆழமாக விவாதிக்கப்பட்டுள்ளது.
“நியூசிலாந்து நாடாளுமன்றத்தின் முக்கிய உறுப்பினரான வானுஷி வோல்டர்ஸ் தனது இலங்கை பூர்வீகம் குறித்தும், தற்போதைய சூழலில் நியூசிலாந்தில் வாழும் இலங்கையைச் சேர்ந்த புலம்பெயர்ந்த மக்கள் அந்நாட்டின் வளர்ச்சிக்கு ஆற்றிவரும் முக்கிய பங்களிப்புகள் குறித்தும் இச்சந்திப்பில் நெகிழ்ச்சியுடன் நினைவுகூர்ந்தார்” என்றும் வெளிவிவகார அமைச்சர் விஜித ஹேரத் தனது பதிவில் சுட்டிக்காட்டியுள்ளார்.
