மாறிவரும் உலகளாவிய சூழ்நிலைகள் மற்றும் வெளிப்புற அதிர்ச்சிகள் காரணமாக 2026 ஆம் ஆண்டுக்கான இலங்கையின் பொருளாதார வளர்ச்சிக் கண்ணோட்டம் நிச்சயமற்றதாகவே உள்ளது என மத்திய வங்கி ஆளுநர் நந்தலால் வீரசிங்க தெரிவித்தார்.
நாட்டின் எதிர்பார்க்கப்படும் வளர்ச்சி இலக்கு குறித்த கேள்விகளுக்குப் பதிலளித்த ஆளுநர், அண்மைய மாதங்களில் உலகப் பொருளாதாரச் சூழலில் ஏற்பட்ட மாற்றங்களைத் தொடர்ந்து, கணிப்புகள் செய்வது மிகவும் கடினமாகிவிட்டதாகக் கூறினார். தற்போதைய உலகளாவிய நிச்சயமற்ற நிலைகளின் கால அளவைப் பொறுத்தே வளர்ச்சியின் மீதான தாக்கம் அமையும் என்றும் அவர் விளக்கினார்.
சில மாதங்களுக்குள் நிலைமைகள் சீரடைந்தால், வளர்ச்சியின் மீதான தாக்கம் குறைவாகவே இருக்கக்கூடும், ஆனால் நீண்ட கால சீர்குலைவு பொருளாதார வளர்ச்சியில் பெரும் தாக்கத்தை ஏற்படுத்தக்கூடும். இலங்கை ரூபாயின் மீதான அழுத்தம் குறித்துப் பேசிய மத்திய வங்கியின் ஆளுநர், தற்போதைய மத்திய கிழக்கு நெருக்கடி மற்றும் அதிகரித்து வரும் உலகளாவிய எண்ணெய் விலைகளே இதற்கு முக்கியக் காரணம் என்றும், இவை அந்நியச் செலாவணிச் செலவினங்களை அதிகரித்துள்ளன என்றும் கூறினார்.
இறக்குமதி செய்யப்படும் எரிபொருளைச் சார்ந்துள்ள பல நாடுகள் இதேபோன்ற நாணய மதிப்பு வீழ்ச்சிப் போக்குகளைச் சந்தித்துள்ளன என்றும், அதற்கு உதாரணமாக இந்தியா, நேபாளம், இந்தோனேசியா மற்றும் தாய்லாந்து ஆகியவற்றை அவர் குறிப்பிட்டார்.
இலங்கையின் 2022 ஆம் ஆண்டு பொருளாதார நெருக்கடியின்போது, நாட்டுக்கே உரித்தான உள்நாட்டுக் காரணிகளால் ஏற்பட்ட கடுமையான நாணயச் சரிவுக்கும், தற்போதைய நிலைமைக்கும் கணிசமான வேறுபாடு இருப்பதாகவும் ஆளுநர் வலியுறுத்தினார்.
ஏனைய நாடுகளும் இதேபோன்ற போக்குகளைச் சந்தித்துள்ளன என்பதைக் குறிப்பிட்ட அவர், நாணய மாற்று விகித வீழ்ச்சியைப் பொருளாதாரச் சரிவின் அறிகுறியாகக் கருதுவதற்கு எதிராகவும் எச்சரித்தார். சர்வதேச நாணய நிதியம் (IMF) தொடர்பான நிதியுதவியாக இலங்கை சுமார் 700 மில்லியன் அமெரிக்க டொலர்களைப் பெறும் என்றும், அதே வேளையில் உலக வங்கி மற்றும் ஆசிய அபிவிருத்தி வங்கியிடமிருந்து (ADB) கிட்டத்தட்ட 300 மில்லியன் அமெரிக்க டொலர் நிதியுதவி அண்மைக்காலத்தில் எதிர்பார்க்கப்படுகிறது.
எதிர்பார்க்கப்படும் இந்த நிதி வரவுகள் அந்நியச் செலாவணிக் கையிருப்பை வலுப்படுத்தி, பொருளாதார ஸ்திரத்தன்மையைப் பேணுவதற்கான முயற்சிகளுக்கு ஆதரவளிக்கும் என்றும் அவர் கூறினார். இதனிடையே நேற்றைய தினம் அமெரிக்க டொலரின் விற்பனை விலை மேலும் உயர்ந்து 334 ரூபாவை எட்டியது. இது 2023 நவம்பர் 29 க்குப் பிறகு பதிவான மிக உயர்ந்த விற்பனை விலையாகும்.
