துபாய் கடற்பரப்பில் மசகு எண்ணெய் ஏற்றிச் சென்ற கப்பல் மீது தாக்குதல் நடத்தப்பட்டு தீவைக்கப்பட்ட சம்பவத்தைத் தொடர்ந்து, அமெரிக்கா மற்றும் ஈரான் இடையிலான பதற்றம் மேலும் தீவிரமடைந்துள்ளது.இந்த தாக்குதலுக்கு பின்னர், ஹார்முஸ் நீரிணையை திறக்காவிட்டால் ஈரானின் எரிசக்தி அமைப்புகள் மீது தாக்குதல் நடத்தப்படும் என அமெரிக்க ஜனாதிபதி டொனால்ட் ட்ரம்ப் எச்சரிக்கை விடுத்துள்ளார்.
கடந்த பெப்ரவரி மாதம் முதல் அமெரிக்கா மற்றும் இஸ்ரேல் மேற்கொண்ட தாக்குதல்களுக்கு பதிலடி நடவடிக்கையாக, ஈரான் மற்றும் அதனுடன் தொடர்புடைய தரப்புகள் வர்த்தகக் கப்பல்களை இலக்காகக் கொண்டு தாக்குதல்களை அதிகரித்துள்ளதாக தெரிவிக்கப்படுகிறது.
இந்த மோதல் ஒரு மாதத்திற்கும் மேலாக நீடித்து, மத்திய கிழக்கு முழுவதும் பரவி, உலகளாவிய எரிசக்தி விநியோகம் மற்றும் பொருளாதார நிலைத்தன்மைக்கு அச்சுறுத்தலாக மாறியுள்ளது.சுமார் 2 மில்லியன் பீப்பாய் எண்ணெய் ஏற்றிச் சென்ற கப்பலில் ஏற்பட்ட தீ பின்னர் கட்டுக்குள் கொண்டு வரப்பட்டதாக அதிகாரிகள் தெரிவித்துள்ளதுடன், உயிரிழப்புகள் எதுவும் பதிவாகவில்லை.
இந்நிலையில், உலக சந்தையில் எண்ணெய் விலைகள் உயர்வடைந்துள்ளதுடன், எரிபொருள் விலை உயர்வு பல நாடுகளின் பொருளாதாரத்தையும் பாதிக்கத் தொடங்கியுள்ளது.மேலும், மோதல் விரிவடையும் அபாயம் அதிகரித்துள்ள நிலையில், சர்வதேச சமாதான முயற்சிகளும் தொடர்ந்தும் முன்னெடுக்கப்பட்டு வருகின்றன.
