இஸ்ரேலில் ஈரான் மேற்கொண்டதாகக் கூறப்படும் ஏவுகணைத் தாக்குதல்களைத் தொடர்ந்து, ஈரானுக்கு எதிராக உலக நாடுகள் ஒன்றிணைய வேண்டும் என இஸ்ரேல் பிரதமர் பெஞ்சமின் நெதன்யாகு தெரிவித்துள்ளார்.ஜெருசலேம், அராத் மற்றும் டிமோனா நகரங்களை இலக்காகக் கொண்டு கடந்த இரண்டு நாட்களாக ஈரான் தொடர்ச்சியாக ஏவுகணைத் தாக்குதல்கள் நடத்தியதாக இஸ்ரேல் தெரிவித்துள்ளது.
தாக்குதலில் பாதிக்கப்பட்ட அராத் நகரை இன்று பார்வையிட்டபோது கருத்து தெரிவித்த நெதன்யாகு, கடந்த 48 மணிநேர நிகழ்வுகள் ஈரான் உலகளாவிய அச்சுறுத்தலாக இருப்பதற்கான சான்று எனக் குறிப்பிட்டார். பொதுமக்கள் வசிக்கும் பகுதிகளையே குறிவைத்து தாக்குதல் நடத்தப்பட்டுள்ளதாகவும் அவர் கூறினார்.
ஜெருசலேமின் மேற்குச் சுவர், புனிதகல்லறை தேவாலயம் மற்றும் அல்-அக்ஸா பள்ளிவாசல் அருகில்கூட ஏவுகணைகள் வீசப்பட்டதாக அவர் தெரிவித்தார். அதிர்ஷ்டவசமாக உயிரிழப்புகள் எதுவும் பதிவாகவில்லை என்றும் குறிப்பிட்டார்.
மேலும், சர்வதேச கடல் வழிப் பாதைகளை பாதித்து எரிசக்தி நெருக்கடியை உருவாக்க முயற்சிப்பதாக ஈரானை குற்றம்சாட்டிய அவர், உலக நாடுகள் இணைந்து இதற்கு எதிராக செயல்பட வேண்டிய நேரம் இது என வலியுறுத்தினார்.இஸ்ரேலும் அமெரிக்காவும் இணைந்து செயல்பட்டு வருவதாகவும், உலக நாடுகளின் தலைவர்கள் இதற்கு ஆதரவளிக்க வேண்டும் என்றும் அவர் அழைப்பு விடுத்தார்.
