பிரான்ஸின் முன்னாள் ஜனாதிபதி நிக்கோலா சர்கோசி, பிஸ்முத் மற்றும் பைக்மாலியோன் வழக்குகளில் வழங்கப்பட்ட தண்டனைகளை ஒன்றிணைக்க வேண்டும் என நீதிமன்றத்தில் கோரிக்கை விடுத்திருந்தார். பிஸ்முத் வழக்கில் தாம் மின்னணு கண்காணிப்பு வளையம் அணிந்து தண்டனையை அனுபவித்த காலத்தை, பைக்மாலியோன் வழக்கின் தண்டனையாகக் கருத வேண்டும் என்றும் அவர் வாதிட்டிருந்தார்.
எனினும், பாரிஸ் குற்றவியல் நீதிமன்றம் கடந்த 9ஆம் திகதி இந்தக் கோரிக்கையை நிராகரித்துள்ளது. இதன் காரணமாக பைக்மாலியோன் வழக்கில் வழங்கப்பட்ட ஆறு மாத கட்டாய சிறைத் தண்டனையை அவர் தொடர்ந்து அனுபவிக்க வேண்டும் என தீர்மானிக்கப்பட்டுள்ளது. இந்தத் தண்டனை மின்னணு கண்காணிப்பு வளையம் அணியும் முறையில் நிறைவேற்றப்படலாம் எனவும் தெரிவிக்கப்பட்டுள்ளது.பைக்மாலியோன் வழக்கில், 2012ஆம் ஆண்டு ஜனாதிபதி தேர்தல் பிரச்சாரத்திற்காக சட்டவிரோதமாக நிதி பயன்படுத்தியதாக சர்கோசி குற்றவாளியாக அறிவிக்கப்பட்டார்.
இதற்காக 2024ஆம் ஆண்டு மேல்முறையீட்டு நீதிமன்றம் அவருக்கு ஒரு ஆண்டு சிறைத் தண்டனை வழங்கியதுடன், அதில் ஆறு மாதங்கள் கட்டாய தண்டனையாக நிர்ணயிக்கப்பட்டது. பின்னர் 2025ஆம் ஆண்டு அந்தத் தீர்ப்பு இறுதியாக உறுதி செய்யப்பட்டது.
அதேவேளை, பிஸ்முத் வழக்கில் ஊழல் மற்றும் அதிகார துஷ்பிரயோகம் குற்றச்சாட்டுகளுக்காக சர்கோசி மூன்று ஆண்டு சிறைத் தண்டனைக்கு உட்படுத்தப்பட்டார்.
அதில் ஒரு ஆண்டு கட்டாய தண்டனையாகும். அந்தத் தண்டனையின் ஒரு பகுதியாக அவர் 2025ஆம் ஆண்டு பிப்ரவரி முதல் மே மாதம் வரை மின்னணு கண்காணிப்பு வளையம் அணிந்து தண்டனையை அனுபவித்தார்.இந்நிலையில், 2007ஆம் ஆண்டு ஜனாதிபதி தேர்தல் பிரச்சாரத்திற்காக லிபியாவிலிருந்து நிதி பெற்றதாகக் கூறப்படும் மற்றொரு வழக்கிலும் சர்கோசி மீண்டும் நீதிமன்றில் ஆஜராக உள்ளார். அந்த வழக்கின் மேல்முறையீட்டு விசாரணை மார்ச் 16ஆம் திகதி ஆரம்பமாகவுள்ளது.
