வர்த்தக உறவில் சீனாவுடன் ஏற்பட்ட தவறுகளை இந்தியாவுடன் செய்யமாட்டோம் என்று அமெரிக்க துணை வெளியுறவுத் துறை அமைச்சர் கிறிஸ்டோபர் லாண்டாவ் தெரிவித்துள்ளார்.தில்லியில் நடைபெற்ற புவிசார் அரசியல் மற்றும் பொருளாதார மாநாட்டில் பங்கேற்றபோது அவர் இவ்வாறு கூறினார்.அவர் மேலும் தெரிவித்ததாவது:
கடந்த இருபது ஆண்டுகளுக்கு முன் சீனாவுடன் மேற்கொண்ட வர்த்தக உறவிலிருந்து பல பாடங்களை அமெரிக்கா கற்றுக்கொண்டுள்ளது. எனவே, அந்த அனுபவங்களை கருத்தில் கொண்டு இந்தியாவுடன் இறுதி செய்யப்படும் வர்த்தக ஒப்பந்தத்தில் அதிக தெளிவுடன் செயல்படுவோம். அமெரிக்காவின் நலன்களை பாதுகாப்பதோடு, இருநாடுகளுக்கும் பயனளிக்கும் வகையில் ஒத்துழைப்பை வலுப்படுத்துவோம்.
அனைத்து சந்தைகளையும் மேம்படுத்த நாங்கள் ஆதரவளிப்போம். பல வர்த்தக துறைகளில் இந்தியா வேகமாக முன்னேறி வருவதை காண்கிறோம். “அமெரிக்கா முதலில்” என்ற கொள்கை, அமெரிக்கா மட்டும் என்ற அர்த்தம் அல்ல; பிற நாடுகளுடன் ஒத்துழைப்பதன் மூலம் அமெரிக்கா தனது இலக்குகளை அடைய முடியும்.
பிரதமர் நரேந்திர மோடி இந்தியாவை மேம்படுத்த விரும்புவது போல, ஜனாதிபதி டொனால்ட் டிரம்ப் அமெரிக்காவை முன்னேற்ற விரும்புகிறார். இருபத்தொன்றாம் நூற்றாண்டு இந்தியாவின் எழுச்சியுடன் தொடர்புடையது.
உலகின் அதிக மக்கள் தொகை கொண்ட நாடாக இந்தியா, இந்த நூற்றாண்டின் எதிர்காலத்தை வடிவமைக்கும் முக்கிய நாடுகளில் ஒன்றாக இருக்கும்.எங்கள் நாட்டின் நலன்களை முன்னிட்டு நான் இங்கு வந்துள்ளேன். நமது கூட்டாண்மையை வலுப்படுத்துவது இந்தியாவுக்கும் நன்மை பயக்கும் என நாங்கள் நம்புகிறோம் என்று அவர் குறிப்பிட்டார்.
