மத்திய கிழக்கில் பதற்றம் தீவிரம்: ஈரானிய போர் விமானங்கள் 2 வீழ்த்தப்பட்டதாக கத்தார் அறிவிப்பு.!
அமெரிக்கா மற்றும் இஸ்ரேல் இணைந்து ஈரான் மீது மேற்கொண்டுள்ள தாக்குதல்களின் பின்னணியில், மத்திய கிழக்கு பிராந்தியத்தில் பதற்றம் அதிகரித்துள்ளது. இந்நிலையில், ஈரானைச் சேர்ந்த இரண்டு Sukhoi Su-24 போர் விமானங்களை தமது படைகள் சுட்டு வீழ்த்தியுள்ளதாக கத்தார் பாதுகாப்பு அமைச்சகம் அறிவித்துள்ளது.
அமைச்சகம் இன்று வெளியிட்ட அறிக்கையில், கத்தார் அமீரி விமானப்படை ஈரானிலிருந்து அணுகிய இரண்டு போர் விமானங்களை தடுத்து வீழ்த்தியதாக தெரிவித்துள்ளது. அதேவேளை, கத்தாரை நோக்கி ஏவப்பட்ட ஏழு பாலிஸ்டிக் ஏவுகணைகள் மற்றும் ஐந்து ட்ரோன்களையும் வான் பாதுகாப்பு அமைப்புகள் அழித்துள்ளதாக கூறப்பட்டுள்ளது.அனைத்து அச்சுறுத்தல்களும் அவற்றின் குறிக்கோள் இடங்களை அடைவதற்கு முன்னரே தடுக்கப்பட்டதாக பாதுகாப்பு அமைச்சகம் குறிப்பிட்டுள்ளது.
அமெரிக்கா–இஸ்ரேல் தாக்குதல்களில் ஈரானின் மூத்த தலைவர்கள் குறிவைக்கப்பட்டதாக கூறப்படும்நிலையில், அதற்கு பதிலடியாக வளைகுடா நாடுகள் மற்றும் அமெரிக்க இராணுவத் தளங்களை இலக்காகக் கொண்டு ஈரான் ஏவுகணை மற்றும் ட்ரோன் தாக்குதல்களை முன்னெடுத்து வருவதாக தகவல்கள் தெரிவிக்கின்றன.
வளைகுடா பிராந்தியத்தில் அமெரிக்க இராணுவ வசதிகளுக்கான முக்கிய தளமாக விளங்கும் கத்தார், தமது நிலப்பரப்பில் நடைபெறும் எந்தவித தாக்குதல்களையும் கண்டிப்பதாகவும், நாட்டின் இறையாண்மையை பாதுகாக்கும் உரிமையை வலியுறுத்துவதாகவும் தெரிவித்துள்ளது.பாதுகாப்பு ஏற்பாடுகள் வலுப்படுத்தப்பட்டுள்ள நிலையில், குடியிருப்பாளர்கள் மற்றும் பயணிகள் அமைதியாக இருந்து அதிகாரப்பூர்வ அறிவுறுத்தல்களைப் பின்பற்றுமாறு கேட்டுக்கொள்ளப்பட்டுள்ளது.
