ஆயுதங்களை கீழே வைத்து சரணடையுங்கள்: ஈரானுக்கு அமெரிக்க ஜனாதிபதி ட்ரம்ப் கடும் எச்சரிக்கை.!

ஈரான் இராணுவம், புரட்சிகர காவல் படை மற்றும் பொலிஸார் ஆகியோர் ஆயுதங்களை கீழே வைத்து சரணடைய வேண்டும் என அமெரிக்க ஜனாதிபதி டொனால்ட் ட்ரம்ப் எச்சரிக்கை விடுத்துள்ளார். இல்லையெனில் கடுமையான விளைவுகளை எதிர்கொள்ள நேரிடும் எனவும் அவர் தெரிவித்துள்ளார்.

அமெரிக்கா மேற்கொண்ட தாக்குதல்களில் ஈரானின் 48 முக்கிய தலைவர்கள் உயிரிழந்துள்ளதாகவும், ஈரானுடன் பேச்சுவார்த்தைக்கு தயார் என்றும் அவர் குறிப்பிட்டுள்ளார். ஈரானின் இராணுவத் தலைமை முழுமையாக செயலிழந்துவிட்டதாகவும் ட்ரம்ப் கூறியுள்ளார்.
“ஈரான் உலகின் மிகப்பெரிய அச்சுறுத்தல்களில் ஒன்றாகும்.

அமெரிக்க மக்களை அணு ஆயுத அச்சுறுத்தலிலிருந்து பாதுகாக்க தேவையான நடவடிக்கைகள் எடுக்கப்பட்டுள்ளன. கடந்த பலதசாப்தங்களாக அமெரிக்காவுக்கு எதிராக மேற்கொள்ளப்பட்ட அச்சுறுத்தல்கள் இனி தொடராது,” என அவர் தெரிவித்தார்.
ஈரான் மக்களை நோக்கியும் அவர் கருத்து வெளியிட்டு, நாட்டின் எதிர்காலத்தை தாங்களே தீர்மானிக்க இந்த தருணத்தை பயன்படுத்திக் கொள்ளுமாறு வலியுறுத்தினார். கடந்த சில நாட்களில் அமெரிக்கா மற்றும் அதன் கூட்டாளிகள் இணைந்து நூற்றுக்கணக்கான இலக்குகளை தாக்கியுள்ளதாகவும், தாக்குதல் நடவடிக்கைகள் நிர்ணயிக்கப்பட்ட இலக்குகள் அடையப்படும் வரை தொடரும் என்றும் அவர் கூறியுள்ளார்.