மறைந்த பாலியல் குற்றவாளி ஜெப்ரி எப்ஸ்டீன் தொடர்பான குற்றச்சாட்டுகளை விசாரித்து வரும் அமெரிக்க நாடாளுமன்றக் குழுவின் முன், முன்னாள் வெளியுறவுத்துறை அமைச்சர் ஹிலாரி கிளின்டன் மற்றும் முன்னாள் ஜனாதிபதி பில் கிளின்டன் ஆகியோர் வாக்குமூலம் அளித்துள்ளனர்.
நேற்று (26.02.2026) ஹிலாரி கிளின்டன் முன்னிலையாகிய நிலையில், இன்று (27.02.2026) பில் கிளின்டனும் நேரில் சென்று விளக்கம் அளித்துள்ளார். நீண்டகாலமாக இந்த விசாரணைக்கு எதிர்ப்பு தெரிவித்து வந்த கிளின்டன் தம்பதியினர், நாடாளுமன்ற அவமதிப்பு நடவடிக்கைகளைத் தவிர்க்கும் நோக்கில் இம்முடிவை எடுத்துள்ளதாகத் தகவல்கள் தெரிவிக்கின்றன.
நியூயோர்க் மாநிலத்தின் சப்பாகுவா பகுதியில் விசாரணை நடைபெற்று வருகிறது. பில் கிளின்டன் கடந்த காலங்களில் எப்ஸ்டீனுடன் தொடர்பில் இருந்ததை ஒப்புக்கொண்ட போதிலும், அவரது சட்டவிரோதச் செயல்கள் குறித்து தமக்குத் தெரியாது என மறுத்துள்ளார். அதேபோன்று, ஹிலாரி கிளின்டனும் தமக்கு எப்ஸ்டீனை தனிப்பட்ட முறையில் அறிமுகம் இல்லை என தெரிவித்துள்ளார்.
இந்த விசாரணை அரசியல் பழிவாங்கும் நடவடிக்கை என கிளின்டன் தம்பதியினர் குற்றஞ்சாட்டியுள்ள நிலையில், “யாரும் சட்டத்திற்கு மேலானவர்கள் அல்ல” என்பதை உறுதி செய்யவே இவ்விசாரணை நடத்தப்படுவதாகக் குழுத் தலைவர் ஜேம்ஸ் கோமர் தெரிவித்துள்ளார்.
கடந்த 1983 ஆம் ஆண்டு ஜெரால்ட் ஃபோர்டு முன்னிலையாகியதற்குப் பின்னர், அமெரிக்க முன்னாள் ஜனாதிபதி ஒருவர் நாடாளுமன்றக் குழுவின் முன் சாட்சியமளிப்பது இதுவே முதல் முறை என்பது குறிப்பிடத்தக்கது.
