மத்திய கிழக்கில் போர் மூளும் அபாயம் அதிகரித்துள்ள நிலையில், அதனைத் தவிர்க்கும் முயற்சியாக அமெரிக்கா மற்றும் ஈரான் அதிகாரிகள் இன்று ஜெனீவாவில் மூன்றாவது சுற்று மறைமுகப் பேச்சுவார்த்தைகளைத் தொடங்கியுள்ளனர்.ஈரானுடன் அணுசக்தி ஒப்பந்தம் எட்டப்படாவிட்டால் தாக்குதல் நடத்தப்படும் என அமெரிக்க ஜனாதிபதி டொனால்ட் ட்ரம்ப் எச்சரித்துள்ளதால், இப்பேச்சுவார்த்தை முக்கியத்துவம் பெற்றுள்ளது.
2003 ஆம் ஆண்டு ஈராக் மீது நடத்தப்பட்ட படையெடுப்பிற்குப் பின்னர், தற்போதுதான் அமெரிக்கா தனது மிகப்பெரிய இராணுவப் பலத்தை மத்திய கிழக்கில் நிலைநிறுத்தியுள்ளதாக தெரிவிக்கப்படுகிறது. இரண்டு விமானம் தாங்கிக் கப்பல்கள் உட்பட பெரும் கடற்படை அணிவகுப்பும் ஆயிரக்கணக்கான துருப்புகளும் அப்பகுதிக்கு அனுப்பப்பட்டுள்ளன.மறுபுறம், தாக்குதல் நடத்தப்பட்டால் தகுந்த பதிலடி வழங்கப்படும் என ஈரான் எச்சரித்துள்ளது.
இந்நிலையில், போர் ஏற்படுவதைத் தடுக்கும் கடைசி முயற்சியாக இந்தப் பேச்சுவார்த்தை பார்க்கப்படுகிறது.அண்மைய உரையில், டொனால்ட் ட்ரம்ப், ஈரான் பயங்கரவாதத்தின் மையமாக உள்ளது என்றும், அது அணு ஆயுதம் பெறுவதை அனுமதிக்க முடியாது என்றும் தெரிவித்துள்ளார்.
ஆனால், தனது நாட்டில் யுரேனியம் செறிவூட்டும் நடவடிக்கையை நிறுத்த முடியாது என ஈரான் மறுத்துள்ளதுடன், அணுசக்தித் திட்டம் தொடர்பில் சில தளர்வுகளை வழங்கத் தயாராக இருப்பதாக சுட்டிக்காட்டியுள்ளது.ஓமான் நாட்டின் மத்தியஸ்தத்துடன் நடைபெறும் இப்பேச்சுவார்த்தையில், ஈரானிய தரப்பிற்கு வெளியுறவு அமைச்சர் அப்பாஸ் அரக்சி தலைமை தாங்குகிறார்.
அமெரிக்கத் தரப்பில் ஜாரெட் குஷ்னர் மற்றும் ஸ்டீவ் விட்காஃப் ஆகியோர் பங்கேற்கின்றனர்.ஈரானின் அணுசக்தித் திட்டத்துக்கு விதிக்கப்படவுள்ள கட்டுப்பாடுகள் மற்றும் அந்நாட்டின் பொருளாதாரத்தை பாதித்துள்ள தடைகளை நீக்குதல் ஆகிய விடயங்கள் தொடர்பாக இப்பேச்சுவார்த்தையில் ஆலோசிக்கப்பட்டுள்ளமை குறிப்பிடத்தக்கது.
