அமெரிக்க ஜனாதிபதி டொனால்ட் ட்ரம்ப் கடந்த ஆண்டு பல நாடுகள் மீது பரஸ்பர வரிகளை விதித்திருந்தார். அதன்படி இந்தியாவுக்கு 25 சதவீத வரி விதிக்கப்பட்டதுடன், ரஷ்யாவிலிருந்து எண்ணெய் இறக்குமதி செய்வதற்காக கூடுதலாக 25 சதவீத வரியும் விதிக்கப்பட்டது.
இந்த வரி நடவடிக்கைகளுக்கு எதிராக அமெரிக்க உச்ச நீதிமன்றத்தில் வழக்கு தாக்கல் செய்யப்பட்டது. அதன் பின்னர், ட்ரம்ப் விதித்த வரிகள் செல்லாது என உச்ச நீதிமன்றம் கடந்த வாரம் தீர்ப்பளித்தது.
இதனைத் தொடர்ந்து, வேறு சட்டப்பிரிவின் கீழ் இந்தியா உள்ளிட்ட பல நாடுகளுக்கு 10 சதவீத சுங்கவரி விதிக்கப்படும் என ட்ரம்ப் கடந்த 20ஆம் திகதி அறிவித்தார்.இந்நிலையில், அமெரிக்க ஜனாதிபதி அறிவித்த உலகளாவிய சுங்கவரி 10 சதவீதத்திலிருந்து 15 சதவீதமாக உயரக்கூடும் என தகவல்கள் வெளியாகியுள்ளன.
இந்த வரி, 1974ஆம் ஆண்டு வர்த்தகச் சட்டத்தின் பிரிவு 122இன் கீழ், 150 நாட்களுக்கு அமுலில் இருக்கும் வகையில் நடைமுறைப்படுத்தப்பட்டதாக தெரிவிக்கப்படுகிறது.எனினும், இதற்கான உத்தியோகபூர்வ அறிவிப்பு வெளியான பின்னரே இது நடைமுறைக்கு வரும் என வெள்ளை மாளிகை தெரிவித்துள்ளது.
