தாய்லாந்தின் சியாங் மாய் நகரில் அமைந்துள்ள டைகர் கிங்டம் பூங்காவில், கடந்த இரண்டு வாரங்களுக்குள் 72 புலிகள் உயிரிழந்துள்ளதாக கால்நடைத் திணைக்களம் தெரிவித்துள்ளது.மிக வேகமாகப் பரவும் ‘கேனைன் டிஸ்டெம்பர்’ வைரஸ் தொற்றே இந்த உயிரிழப்புகளுக்குக் காரணமாக இருக்கலாம் என முதற்கட்ட ஆய்வில் தெரியவந்துள்ளது.
பொதுவாக நாய்களில் காணப்படும் இந்த வைரஸ், புலிகளின் சுவாச அமைப்பு, செரிமான அமைப்பு மற்றும் நரம்பு மண்டலத்தை கடுமையாக பாதித்து உயிரிழப்பை ஏற்படுத்தும் என அதிகாரிகள் கூறியுள்ளனர்.
இந்த நிலைமையைத் தொடர்ந்து, சுமார் 240-க்கும் மேற்பட்ட புலிகளை பராமரித்து வந்த குறித்த பூங்கா இரண்டு வாரங்களுக்கு தற்காலிகமாக மூடப்பட்டுள்ளது.மேலும், பூங்கா முழுவதும் கிருமி நாசினி தெளிக்கும் பணிகள் முன்னெடுக்கப்பட்டு வருவதுடன், உயிரிழந்த புலிகளின் உடல்கள் தகனம் செய்யப்பட்டு பாதுகாப்பான முறையில் புதைக்கப்பட்டுள்ளதாக தெரிவிக்கப்பட்டுள்ளது.
