உலகளாவிய ரீதியில் நிலவும் மூலப்பொருட்களுக்கான போட்டி சூழலில், சுரங்க அகழ்வு மற்றும் கனிமத் துறைகளில் ஒத்துழைப்பை விரிவுபடுத்துவதற்கான ஒப்பந்தத்தில் இந்தியாவும் பிரேசிலும் கைச்சாத்திட்டுள்ளன.இந்த ஒப்பந்தம் இந்தியப் பிரதமர் நரேந்திர மோடி மற்றும் பிரேசில் ஜனாதிபதி லூயிஸ் இனாசியோ லுலா டா சில்வா முன்னிலையில் கைச்சாத்திடப்பட்டது. அடுத்த ஐந்து ஆண்டுகளில் 20 பில்லியன் டொலர் வர்த்தக இலக்கை அடைவது என இதில் குறிப்பிடப்பட்டுள்ளது.
மூன்று நாட்கள் உத்தியோகபூர்வ விஜயமாக பிரேசில் ஜனாதிபதி புதுடில்லிக்கு பயணம் செய்திருந்த போது இந்த உடன்பாடு எட்டப்பட்டது.அறிக்கையின்படி, உலகின் முன்னணி இரும்புத் தாது உற்பத்தியாளர்களில் பிரேசில் ஒன்றாகும். உருக்கு உற்பத்திக்குத் தேவையான முக்கிய கனிமங்களின் பெரும் இருப்பு அந்நாட்டில் உள்ளது.
அதிகரித்து வரும் உள்நாட்டு உருக்கு தேவையை பூர்த்தி செய்வதற்கும், நீண்டகால மூலப்பொருள் பாதுகாப்பை உறுதி செய்வதற்கும் இந்த ஒப்பந்தம் உதவும் என தெரிவிக்கப்பட்டுள்ளது.இந்த ஒத்துழைப்பு மூலம் ஆய்வு, சுரங்க அகழ்வு மற்றும் உருக்கு துறை உட்கட்டமைப்பில் முதலீட்டை ஈர்த்தல் ஆகியவற்றில் கவனம் செலுத்தப்படும் என்றும் குறிப்பிடப்பட்டுள்ளது.
