சுதந்திர இலங்கையின் 81ஆவது வரவு – செலவுத் திட்டமாக 2027ஆம் ஆண்டுக்கான வரவு – செலவுத் திட்டம், ஜனாதிபதியும் நிதி அமைச்சருமான கௌரவ அநுரகுமார திசாநாயக்க அவர்களினால் நாடாளுமன்றத்தில் சமர்ப்பிக்கப்பட்டுள்ள நிலையில், பெருந்தோட்ட சமூகத்தின் நலன் மற்றும் விவசாய அபிவிருத்திக்காக பாரிய நிதி ஒதுக்கீடுகள் மேற்கொள்ளப்பட்டுள்ளமை குறித்து பெருந்தோட்ட மற்றும் சமூக உட்கட்டமைப்பு வசதிகள் பிரதி அமைச்சர் சுந்தரலிங்கம் பிரதீப் அவர்கள் ஜனாதிபதிக்கு தனது மனமார்ந்த நன்றிகளையும் வாழ்த்துக்களையும் தெரிவித்துள்ளார்.
நாட்டின் பொருளாதார மறுமலர்ச்சி மற்றும் உழைக்கும் மக்களின் வாழ்க்கைத் தரத்தை மேம்படுத்தும் நோக்கில் தயாரிக்கப்பட்டுள்ள இந்த வரலாற்றுச் சிறப்புமிக்க வரவு – செலவுத் திட்டத்தில், பெருந்தோட்ட மற்றும் சமூக உட்கட்டமைப்பு வசதிகள் அமைச்சின் கீழ் முன்னெடுக்கப்படவுள்ள முக்கிய அபிவிருத்தித் திட்டங்களுக்காக மொத்தமாக 7,450 மில்லியன் ரூபாய் நிதி ஒதுக்கீடு செய்யப்பட்டுள்ளதாக பிரதி அமைச்சர் சுட்டிக்காட்டியுள்ளார்.
இதற்கமைய, கடந்த வருடம் அதிகரிக்கப்பட்ட பெருந்தோட்டத் தொழிலாளர்களின் சம்பளத்திற்காக அரசாங்கத்தினால் வழங்கப்பட்ட கொடுப்பனவைத் தொடர்ந்தும் முன்னெடுத்துச் செல்வதற்காக இம்முறையும் 3,800 மில்லியன் ரூபாய் நிதி ஒதுக்கீடு செய்யப்பட்டுள்ளது.
இது பெருந்தோட்ட சமூகத்தின் பொருளாதார மற்றும் வருமான நிலையைத் தொடர்ந்தும் வலுப்படுத்துவதற்கான அரசாங்கத்தின் உறுதியான அர்ப்பணிப்பை வெளிப்படுத்துவதாக அவர் குறிப்பிட்டுள்ளார்.
அத்துடன், நுவரெலியா, பதுளை, கண்டி, இரத்தினபுரி, கேகாலை, மாத்தளை, குருநாகல், மாத்தறை, காலி, களுத்துறை, கொழும்பு மற்றும் மொனராகலை ஆகிய 12 மாவட்டங்களில் வாழும் பெருந்தோட்ட சமூகத்தின் வாழ்க்கைத் தரத்தை உயர்த்தும் நோக்கில் உட்கட்டமைப்பு வசதிகளை அபிவிருத்தி செய்வதற்காக 3,000 மில்லியன் ரூபாய் ஒதுக்கப்பட்டுள்ளது.
இதன் மூலம் பெருந்தோட்டப் பகுதிகளின் சுகாதார வசதிகள் மற்றும் குடிநீர் விநியோகத்தை மேம்படுத்துதல், பிரஜாசக்தி (Praja Shakthi) நிலையங்களை அபிவிருத்தி செய்தல் மற்றும் அணுகல், வீதிகளைப் புனரமைத்தல் ஆகிய அடிப்படைத் தேவைகள் நிறைவேற்றப்படவுள்ளன.
மேலும், வடமாகாணத்தில் தென்னைப் பயிர்ச்செய்கையை விரிவுபடுத்துதல், தேங்காய் உற்பத்தியை அதிகரித்தல் மற்றும் தென்னை சார்ந்த பொருளாதார நடவடிக்கைகளை வலுப்படுத்துதல் ஆகியவற்றை இலக்காகக் கொண்டு வடக்கு தென்னை முக்கோணத்தைச் செயற்படுத்துவதற்காக 650 மில்லியன் ரூபா நிதி ஒதுக்கீடு செய்யப்பட்டுள்ளதாகவும், இதன் ஊடாக அப்பிரதேச விவசாய மக்களின் புதிய வருமான வழிகள் விரிவுபடுத்தப்படவுள்ளதாகவும் பிரதி அமைச்சர் சுந்தரலிங்கம் பிரதீப் தெரிவித்துள்ளார்.
நாட்டின் பொருளாதார சவால்களுக்கு மத்தியிலும், பெருந்தோட்ட மக்களின் வாழ்வாதாரம், உட்கட்டமைப்பு மற்றும் வடக்கு விவசாயப் பொருளாதாரம் ஆகியவற்றிற்கு முன்னுரிமை அளித்துள்ளமைக்காக மாண்புமிகு ஜனாதிபதி அநுரகுமார திசாநாயக்க அவர்களுக்குத் தனது கௌரவத்தையும் நன்றியையும் மீண்டும் ஒருமுறை தெரிவித்துக் கொண்ட பிரதி அமைச்சர், ஒதுக்கப்பட்டுள்ள இந்த நிதியை உரிய முறையில் முகாமைத்துவம் செய்து மக்களுக்கு அதன் முழுமையான பயன்கள் சென்றடைவதை தமது அமைச்சு உறுதி செய்யும் எனவும் மேலும் தெரிவித்துள்ளார்.
