கொழும்பு பம்பலப்பிட்டி முஸ்லிம் மகளிர் கல்லூரியின் 80ஆவது ஆண்டு நிறைவைக் கொண்டாடும் வகையில், பழைய மாணவிகள் சங்கம் மற்றும் பாடசாலை அபிவிருத்திச் சங்கம் இணைந்து பல்வேறு நிகழ்ச்சிகளை ஏற்பாடு செய்திருந்தன.
அந்த வகையில், பாடசாலை நடைபவனி, 80ஆவது ஆண்டு நிறைவைக் குறிக்கும் உத்தியோகபூர்வ நினைவு முத்திரை வெளியீடு, மரநடுகை விழா மற்றும் மருத்துவ முகாம் உள்ளிட்ட பல்வேறு நிகழ்ச்சிகள் இடம்பெற்றன.
இதன் ஒரு அங்கமாக, கடந்த நவம்பர் 05ஆம் திகதி, பாடசாலை அபிவிருத்திச் சங்கத்துடன் இணைந்து Aventra Hospital ஏற்பாடு செய்திருந்த ஆசிரியர்களுக்கான மருத்துவ முகாம் சிறப்பாக நடைபெற்றது.
டாக்டர் அஹமட் ஷியாமின் தலைமையிலான மருத்துவக் குழுவினர் இம்முகாமில் கலந்துகொண்டு ஆசிரியர்களுக்குத் தேவையான மருத்துவ சேவைகளை வழங்கினர்.
இம்மருத்துவக் குழுவில் பம்பலப்பிட்டி முஸ்லிம் மகளிர் கல்லூரியில் கல்வி பயின்ற பழைய மாணவிகளும் இடம்பெற்றிருந்தமை இந்நிகழ்வின் சிறப்பம்சமாக அமைந்தது.
இந்நிகழ்வில் கல்லூரியின் அதிபர் நஸ்ரியா மூனாஸ், தற்போது பாடசாலையில் பணியாற்றும் ஆசிரியர்கள் மற்றும் ஓய்வுபெற்ற ஆசிரியர்கள் எனப் பலரும் கலந்துகொண்டனர்.
அத்துடன், பாடசாலை அபிவிருத்திச் சங்கத்தின் செயலாளர் அஹமட் நூர்தீன் உள்ளிட்ட சங்க உறுப்பினர்களும் இம்மருத்துவ முகாமை ஏற்பாடு செய்வதில் முக்கிய பங்களிப்பை வழங்கியிருந்தனர்.
