திருடர்களைத் தப்பவிடாதீர்கள்! : அநுரவுக்கு ஆதரவாகக் கொழும்பில் ஒன்றுதிரண்ட மக்கள்
“திருடர்களுக்குத் தண்டனை வழங்குவதற்கு எதிரான சதிமுயற்சிகளைத் தோற்கடிப்போம்” எனும் தொனிப்பொருளின் கீழ், “ஜனவரமே புரவசியோ” (மக்கள் ஆணை) அமைப்பின் ஏற்பாட்டில் கொழும்பில் மாபெரும் ஆர்ப்பாட்டப் பேரணி நேற்று முன்னெடுக்கப்பட்டது.
பௌத்த பிக்குகள் உள்ளிட்ட பெருந்திரளான மக்கள் கலந்துகொண்ட இந்தப் பேரணி, கொழும்பு – கோட்டையிலிருந்து ஆரம்பமாகி காலிமுகத்திடலில் உள்ள ஜனாதிபதி செயலகத்தைச் சென்றடைந்தது.
“திருடர்கள், ஊழல்வாதிகள் மற்றும் போதைப்பொருள் கடத்தல்காரர்களுக்குத் தண்டனை வழங்குவதற்கு எதிராகச் செயற்படும் சதிவலையைத் தோற்கடிப்போம்” என்ற வாசகங்கள் தாங்கிய பதாதைகளை ஏந்தியவாறு ஆர்ப்பாட்டக்காரர்கள் ஜனாதிபதி செயலகத்தை முற்றுகையிட்டனர்.
“ஜனாதிபதி அவர்களே, நாட்டை அழித்த ஊழல்வாதிகளின் சதிக்கு இடமளிக்காதீர்கள்!” என்று கோஷங்களை எழுப்பி ஜனாதிபதி அநுரகுமார திஸாநாயக்கவுக்குத் தமது ஆதரவையும் அவர்கள் வெளிப்படுத்தினர்.
ஆர்ப்பாட்டத்தைத் தொடர்ந்து, ஜனாதிபதிக்கு விசேட கோரிக்கை அடங்கிய மகஜரொன்றை கையளிக்கப் பேரணியில் கலந்துகொண்டோர் முற்பட்டனர். எனினும், அந்தவேளையில் ஜனாதிபதி அநுரகுமார திஸாநாயக்க அலுவலகத்தில் இருக்கவில்லை என்று தெரிவித்த அங்கு கடமையில் இருந்த பொலிஸ் அதிகாரிகள், அதற்குப் பதிலாக உரிய அதிகாரிகளிடம் அந்த மகஜரைக் கையளிப்பதற்கான வசதிகளைச் செய்து தருவதாக அறிவித்தனர்.
இதனையடுத்து, ஆர்ப்பாட்டத்தில் கலந்துகொண்ட பௌத்த பிக்குகள் உள்ளிட்ட குழுவினர், அந்த மகஜரைக் கையளிப்பதற்காக ஜனாதிபதி செயலகத்துக்குள் சென்று அதிகாரிகளிடம் அதனைக் கையளித்தனர்.
