உலக மறைபரப்பு ஞாயிறு தினத்தை முன்னிட்டு இன்று ஞாயிற்றுக்கிழமை (18) காலை மன்னார் மறை மாவட்டத்தில் உள்ள கத்தோலிக்க தேவாலயங்களில் காலை விசேட திருப்பலியின் பின்னர் மறைபரப்பு சந்தை நிகழ்வு இடம்பெற்றது.
இந்த நிலையில் மன்னார் தூய செபஸ்தியார் பேராலயத்தில் இன்று ஞாயிற்றுக்கிழமை காலை 6.30 மணியளவில் மன்னார் மறைமாவட்ட ஆயர் மேதகு அந்தோனிப்பிள்ளை ஞானப்பிரகாசம் ஆண்டகை தலைமையில் விசேட திருப்பலி ஒப்புக் கொடுக்கப்பட்டது.
திருப்பலியை தொடர்ந்து மன்னார் மறை மாவட்டம் உதயமாகி நூறாவது ஆண்டையொட்டி முன்னெடுக்கப்படும் மறைபரப்பு ஞாயிறு தினத்தையொட்டி ஆலய வளாகத்தில் ஏற்பாடு செய்யப்பட்ட மறைபரப்பு சந்தை நிகழ்வை மன்னார் மறைமாவட்ட ஆயர் மேதகு அந்தோனிப்பிள்ளை ஞானப்பிரகாசம் ஆண்டகை வைபவ ரீதியாக ஆரம்பித்து வைத்தனர்.
இதன் போது தூய செபஸ்தியார் பேராலய பங்குத்தந்தை அருட்தந்தை பி . கிறிஸ்து நாயகம் அடிகளார் உள்ளடங்களாக அருட்தந்தையர்கள் கலந்து கொண்டனர்.
இதன் போது இடம்பெற்ற மறைபரப்பு சந்தை நிகழ்வில் ஆயிரக்கணக்கான மக்கள் கலந்து கொண்டு தமக்கு தேவையான பொருட்களை கொள்வனவு செய்து கொண்டமை குறிப்பிடத்தக்கது.
உலக மறைபரப்பு ஞாயிறு கத்தோலிக்க திருச்சபையால் உலகளாவிய நற்செய்தி அறிவிப்புப் பணிக்காகவும், மறைப்பணியாளர் களுக்கு ஆதரவு வழங்கும் நோக்கத்துக்காகவும் ஒவ்வொரு ஆண்டும் அக்டோபர் மாதத்தில் கடைபிடிக்கப்படும் ஒரு சிறப்பான திருவழிபாட்டு நாளாகும். இந்த ஆண்டுக்கான மறைபரப்பு ஞாயிறு இன்று (அக்டோபர் 18, 2026) அனுசரிக்கப் படுகிறமை குறிப்பிடத்தக்கது.
