யாழ்ப்பாண மாவட்டத்தில் பாதுகாப்புப் படையினரின் வசமுள்ள காணிகள் படிப்படியாக விடுவிக்கப்பட்டு வருகின்றன என்றும், வெகு விரைவில் கணிசமான அளவிலான காணிகள் மீள விடுவிக்கப்படும் என்றும் அமைச்சர் இராமலிங்கம் சந்திரசேகர் தெரிவித்தார்.
யாழ்ப்பாணத்தில் நேற்று ஊடகங்களுக்குக் கருத்துத் தெரிவிக்கும் போதே அவர் இவ்வாறு குறிப்பிட்டார்.
அவர் மேலும் தெரிவிக்கையில்,
“காணி விடுவிப்பு என்பது எங்களது மாவட்டத்தில் மிக முக்கியமானதொரு பேசுபொருளாக இருந்து வருகின்றது. இந்தப் பிரச்சினைக்கு நாங்கள் படிப்படியாகத் தீர்வுகளைப் பெற்றுத் தந்து வருகின்றோம். அந்தவகையில், தற்போதைய அரசு ஆட்சியமைத்த பின்னர் காணிகள் படிப்படியாக விடுவிக்கப்பட்டு வருகின்றன.
குறிப்பாக, பலாலிப் பகுதி காணி விடுவிப்பு தொடர்பில் தீவிரமாகப் பேசப்பட்டு வருவதுடன், அதனை விரைவில் விடுவிப்பதற்கான முதற்கட்ட நடவடிக்கைகளும் முன்னெடுக்கப்பட்டு வருகின்றன.
ஜனாதிபதி விரைவில் யாழ்ப்பாணத்திற்கு விஜயம் செய்யவுள்ளார். அவரது வருகையின் போது, எதிர்பார்த்ததை விடவும் கூடுதலான காணிகளை விடுவிப்பதற்குத் திட்டமிட்டுள்ளோம்.
நாங்கள் இங்கு எவரையும் ஏமாற்றவில்லை. தேர்தல் காலத்தில் மக்களுக்கு அளித்த வாக்குறுதிகளைப் படிப்படியாக நிறைவேற்றி வருகின்றோம் என்பதைப் பணிவோடு தெரிவித்துக்கொள்கின்றேன். ‘மக்களின் காணிகள் மக்களுக்கே’ என்ற கொள்கையின் அடிப்படையில் இந்த நடவடிக்கைகள் எடுக்கப்படுகின்றன.
ஒருவேளை விடுவிக்க முடியாத அளவுக்குச் சில காணிகள் இருந்தால் (அவ்வாறு பெருவாரியாக இருக்காது என நம்புகின்றேன்), அந்தக் காணிகளுக்கு உரிய நட்டஈட்டை வழங்கி, அவற்றை அரசுடைமையாக்குவதற்கும் நடவடிக்கைகள் எடுக்கப்பட்டுள்ளன. வெகு விரைவில் மக்களின் காணிகள் மீள விடுவிக்கப்படும் என்பதை உறுதியாகக் கூறிக் கொள்கின்றேன்.” – என்றார்.
