அரச நிதியைத் துஷ்பிரயோகம் செய்தமை தொடர்பில் முன்னெடுக்கப்பட்டு வரும் விசாரணைகளுக்கு அமைவாக, முன்னாள் பொருளாதார அபிவிருத்தி அமைச்சரான பசில் ராஜபக்ஷவைக் கைது செய்து நீதிமன்றத்தில் முன்னிலைப்படுத்துமாறு குற்றப் புலனாய்வுத் திணைக்களத்தின் சட்டவிரோத சொத்துக்கள் விசாரணைப் பிரிவுக்கு கொழும்பு கோட்டை நீதவான் பசன் அமரசேன இன்று (14) புதன்கிழமை உத்தரவிட்டுள்ளார்.
அத்துடன், சந்தேகநபருக்கு எதிராகப் சர்வதேச பொலிஸாரின் ‘சிவப்பு எச்சரிக்கை’ அறிவித்தலைப் பெற்றுக்கொள்வதற்கான நடவடிக்கைகளை இலகுபடுத்தும் பொருட்டு, சிங்களம் மற்றும் ஆங்கிலம் ஆகிய இரு மொழிகளிலும் பிடியாணை பிறப்பிப்பதாகவும் நீதிவான் குறிப்பிட்டார்.
இலங்கை சுற்றுலா அபிவிருத்திப் பணியகத்திற்குச் சொந்தமான நிதியைத் துஷ்பிரயோகம் செய்தமை தொடர்பாக நடைபெற்று வரும் விசாரணைகள் குறித்து குற்றப் புலனாய்வுத் திணைக்களத்தினால் நீதிமன்றில் சமர்ப்பிக்கப்பட்ட அறிக்கைகளை ஆராய்ந்த பின்னரே இந்த உத்தரவு பிறப்பிக்கப்பட்டது.
கடந்த 2014ஆம் ஆண்டு இலங்கை சுற்றுலா அபிவிருத்திப் பணியகத்திற்கு ஒதுக்கப்பட்ட 7.8 மில்லியன் ரூபாய் நிதி தொடர்பிலேயே இந்த வழக்கு முன்னெடுக்கப்பட்டு வருவதாக குற்றப்புலனாய்வு அதிகாரிகள் நீதிமன்றத்திற்குத் தெரியப்படுத்தினர்.
சுற்றுலா அபிவிருத்திப் பணியகத்தின் உத்தியோகபூர்வ அபிவிருத்திச் செயற்பாடுகளுக்குப் பயன்படுத்தப்பட வேண்டிய குறித்த நிதி, அதற்குப் பயன்படுத்தப்படாமல், ஊவா மாகாண சபைத் தேர்தல் பிரச்சாரத்திற்காக 12,000 ரி-ஷர்ட்டுகளை கொள்வனவு செய்யப் பயன்படுத்தப்பட்டதன் மூலம் அரசாங்கத்திற்கு நிதி இழப்பு ஏற்படுத்தப்பட்டுள்ளதாக குற்றப் புலனாய்வுத் திணைக்களம் சுட்டிக்காட்டியுள்ளமை குறிப்பிடத்தக்கது.
அரச நிதியைத் துஷ்பிரயோகம் செய்தமை தொடர்பான விசாரணைகளின் ஒரு பகுதியாக குற்றப் புலனாய்வுத் திணைக்களத்தின் சட்டவிரோத சொத்துக்கள் விசாரணைப் பிரிவு முன்னர் இது தொடர்பான தகவல்களை நீதிமன்றத்திற்கு அறிக்கையிட்டிருந்தது.
புலனாய்வுத் துறையினரின் வாதங்களைக் கருத்தில் கொண்ட கொழும்பு கோட்டை நீதவான், பசில் ராஜபக்ஷவைக் கைது செய்து நீதிமன்றத்தில் முன்னிலைப்படுத்துமாறும், இன்டர்போல் பொலிஸார் ஊடாகச் சந்தேகநபரைக் கண்டுபிடித்து கைது செய்வதற்கான மேலதிக நடவடிக்கைகளை எடுக்குமாறும் குற்றப் புலனாய்வுத் திணைக்களத்திற்கு கட்டளையிட்டார்.
