வவுனியா பேருந்து நிலையத்தில் பயணி தொடர்பான பிரச்சினையின்போது பேருந்து நடத்துநருடன் கைகலப்பில் ஈடுபட்டதாகக் குறிப்பிடப்படும் சாரதி ஒருவர் மரு அறிவித்தல் வரும் வரை தற்காலிகமாகப் பணியிலிருந்து நீக்கப்பட்டுள்ளார்.
இது தொடர்பில் கிளிநொச்சி மாவட்ட தனியார் பேருந்து சிற்றூர்தி உரிமையாளர் நிறுவனம் வடக்கு மாகாண வீதிப் பயணிகள் போக்குவரத்து அதிகார சபைக்கு உத்தியோகபூர்வமாக அறிவித்துள்ளதாக அதிகார சபையின் தலைவர் பொறியியலாளர் எஸ்.விமலேஸ்வரன் தெரிவித்துள்ளார்.
கடந்த 03.10.2026 அன்று வவுனியா பேருந்து நிலையத்தில், பயணி தொடர்பான பிரச்சினையைத் தொடர்ந்து பேருந்து நடத்துநருடன் குறித்த சாரதி கைகலப்பில் ஈடுபட்டுள்ளார்.
இதனையடுத்து, 09.10.2026 முதல் மேலதிக அறிவித்தல் வரை குறித்த சாரதியைத் தற்காலிகமாகப் பணியிலிருந்து நீக்குவதற்குத் தீர்மானிக்கப்பட்டுள்ளதாகவும், இக்காலப்பகுதியில் அவர் சாரதியாகவோ நடத்துநராகவோ எந்தவொரு பேருந்திலும் பணியாற்ற முடியாது என அறிவுறுத்தப்பட்டுள்ளதாகவும் தெரிவிக்கப்பட்டுள்ளது.
இது தொடர்பில் கருத்துத் தெரிவித்த வடக்கு மாகாண வீதிப் பயணிகள் போக்குவரத்து அதிகார சபையின் தலைவர் பொறியியலாளர் எஸ்.விமலேஸ்வரன்,
பொதுப் போக்குவரத்துச் சேவையில் ஈடுபடும் சாரதிகளும் நடத்துநர்களும் பொறுப்புடனும் கண்ணியத்துடனும் நடந்துகொள்ள வேண்டும் என வலியுறுத்தினார்.
பயணிகள் தொடர்பான பிரச்சினைகளை மோதல்களாக மாற்றாமல், உரிய முறையில் தீர்த்துக்கொள்ள வேண்டும்.
இவ்வாறான சம்பவங்கள் பொதுப் போக்குவரத்துச் சேவையின் ஒழுங்கையும் தரத்தையும் பாதிக்கக்கூடியவை என்பதால், போக்குவரத்துச் சேவையில் ஈடுபடுவோர் தமது கடமைகளைப் பொறுப்புணர்வுடன் நிறைவேற்ற வேண்டும் எனவும் அவர் குறிப்பிட்டார்.
மேலும், போக்குவரத்துச் சேவையில் ஒழுங்கீனங்கள் இடம்பெறும்போது அவற்றை உரிய தரப்பினரின் கவனத்துக்குக் கொண்டுவருவது அவசியம் எனவும் அவர் சுட்டிக்காட்டினார்.
பேருந்துச் சேவைகள் தொடர்பான குறைபாடுகள், சாரதிகள் அல்லது நடத்துநர்களின் ஒழுங்கீனமான செயற்பாடுகள் மற்றும் பயணிகள் எதிர்கொள்ளும் சிரமங்கள் தொடர்பில் பொதுமக்கள் வடக்கு மாகாண வீதிப் பயணிகள் போக்குவரத்து அதிகார சபையின் முறைப்பாட்டு வட்ஸ்அப் இலக்கமான 071 9090900 ஊடாகத் தமது முறைப்பாடுகளைத் தெரிவிக்கலாம்.
பொதுமக்களிடமிருந்து கிடைக்கும் முறைப்பாடுகள் உரிய முறையில் கவனத்தில் கொள்ளப்படும் என்றும் அதிகார சபையின் தலைவர் மேலும் குறிப்பிட்டுள்ளார்.
