பதுளை மாவட்ட நாடாளுமன்ற உறுப்பினர் சாமர சம்பத் தசநாயக்க, இலஞ்ச, ஊழல் ஒழிப்பு ஆணைக்குழுவால் இன்று கைது செய்யப்பட்டுள்ளார்.
நடந்துவரும் விசாரணை ஒன்று தொடர்பில் வாக்குமூலம் வழங்குவதற்காக இலஞ்ச, ஊழல் ஆணைக்குழுவில் ஆஜரானபோதே அவர் கைது செய்யப்பட்டுள்ளார்.
முறையான நடைமுறைகளைப் பின்பற்றாமல், குறிப்பிட்ட மூன்று நிறுவனங்களுக்கு மட்டும் பாஸ்பேட் ஏற்றுமதி செய்யும் பிரத்தியேக அனுமதியை வழங்குவதற்காக அந்த நிறுவனங்களிடமிருந்து 8.1 மில்லியன் ரூபா இலஞ்சம் பெறப்பட்டதாகக் கூறப்படும் குற்றச்சாட்டுத் தொடர்பிலேயே இந்த விசாரணை முன்னெடுக்கப்பட்டுள்ளது.
தேர்ந்தெடுக்கப்பட்ட நிறுவனங்களுக்குத் தேவையான பாஸ்பேட் ஏற்றுமதி உரிமங்களைப் பெற்றுக்கொடுப்பதில் அவர் உதவியுள்ளார் என்றும் குற்றஞ்சாட்டப்பட்டுள்ளது.
இதனிடையே, முன்னாள் இராஜாங்க அமைச்சராக சாமர சம்பத் தசநாயக்க பதவி வகித்த காலத்தில் அவரது பிரத்தியேகச் செயலாளராகச் செயற்பட்ட சுமதிபால லியனாராச்சியும் இந்தச் சம்பவத்துடன் தொடர்புடைய குற்றச்சாட்டில் ஏற்கனவே கைது செய்யப்பட்டு தற்போது விளக்கமறியலில் வைக்கப்பட்டுள்ளமை குறிப்பிடத்தக்கது.
