இலங்கை மற்றும் ஜப்பான் ஆகிய நாடுகளுக்கு இடையிலான சுற்றுலா உறவுகளை மேலும் வலுப்படுத்தும் வகையில், ‘லிட்டில் ஜப்பான் குரூப்’ (Little Japan Group) அமைப்பினால் ஒருங்கிணைக்கப்பட்ட 200 ஜப்பானிய சுற்றுலாப் பயணிகள் அடங்கிய குழுவொன்று இன்று (30) ஸ்ரீலங்கன் ஏர்லைன்ஸ் UL455 விமானம் மூலம் இலங்கைக்கு புறப்பட்டுள்ளது.
ஜப்பானுக்கான இலங்கைத் தூதுவர் பேராசிரியர் பிவிதுரு ஜனக் குமாரசிங்க மற்றும் முதல் செயலாளர் (வணிகம்) சந்துன் சமீரா ஆகியோர் நரிட்டா சர்வதேச விமான நிலையத்திற்குச் சென்று, சுற்றுலாப் பயணிகளை நேரில் சந்தித்து வாழ்த்தி வழியனுப்பி வைத்தனர்.
இலங்கைக்கு வருகை தரும் இந்த ஜப்பானியக் குழுவினர், வரலாற்றுச் சிறப்புமிக்க சிகிரியா உள்ளிட்ட முக்கிய சுற்றுலாத் தலங்களைப் பார்வையிடவுள்ளதுடன், இலங்கையின் பாரம்பரிய ஆயுர்வேத சிகிச்சைகள் மற்றும் ஆரோக்கிய பராமரிப்புச் சேவைகளையும் அனுபவிக்கவுள்ளனர்.
இலங்கைத் தூதரகத்தின் ஆதரவு, வழிகாட்டல் மற்றும் வசதிகளுடன் ‘லிட்டில் ஜப்பான் குரூப்’ இந்தச் சுற்றுலாப் பயணத்தை ஏற்பாடு செய்துள்ளது.
விமான நிலையத்தில் பயணிகளுடன் உரையாடிய தூதுவர் குமாரசிங்க, அவர்களின் வருகையை வரவேற்றதுடன், இலங்கை மீது நம்பிக்கை வைத்து தமது விடுமுறை இடமாகத் தேர்ந்தெடுத்தமைக்கு நன்றி தெரிவித்தார்.
மேலும், அவர்களின் பயணம் பாதுகாப்பானதாகவும், மகிழ்ச்சிகரமானதாகவும் அமையத் தனது நல்வாழ்த்துக்களைத் தெரிவித்தார்.
ஒரே விமானத்தில் 200 ஜப்பானிய சுற்றுலாப் பயணிகள் இலங்கைக்குப் பயணிப்பது இருநாட்டு சுற்றுலாத் துறையில் ஒரு முக்கிய வளர்ச்சி எனச் சுட்டிக்காட்டிய தூதுவர், ஒரே குழுவாக இலங்கைக்குப் பயணிக்கும் மிகப்பெரிய ஜப்பானிய சுற்றுலாப் பயணிகள் குழுக்களில் இதுவும் ஒன்று என்றும் குறிப்பிட்டார்.
ஜப்பானியப் பயணிகளிடையே அதிகரித்து வரும் ஆர்வமும், இலங்கை சுற்றுலாத் துறையின் தொடர்ச்சியான முயற்சிகளும் இருநாடுகளுக்கு இடையிலான சுற்றுலாப் பரிமாற்றங்களை மேலும் வலுப்படுத்தி, இலங்கை தனது முந்தைய சுற்றுலாப் பயணிகளின் வருகை சாதனைகளை மீற உதவும் என்று அவர் நம்பிக்கை வெளியிட்டார்.
ஜப்பானியப் பயணிகளுக்கு இலங்கையை ஒரு கவர்ச்சிகரமான, பாதுகாப்பான மற்றும் மறக்க முடியாத இடமாக முன்னிறுத்துவதில் ‘லிட்டில் ஜப்பான் குரூப்’ ஆற்றிய பங்களிப்பை இலங்கைத் தூதரகம் வெகுவாகப் பாராட்டியுள்ளதுடன், இரு நாடுகளுக்கும் இடையிலான மக்கள் தொடர்புகளையும் சுற்றுலா ஒத்துழைப்பையும் வலுப்படுத்தும் முயற்சிகளுக்குத் தொடர்ந்து ஆதரவளிக்கும் என்றும் தெரிவித்துள்ளது.
