பிரிட்டனுக்கு உத்தியோகபூர்வ பயணம் மேற்கொண்டுள்ள இலங்கை பிரதமர் கலாநிதி ஹரிணி அமரசூரிய, அந்நாட்டு வெளிவிவகாரச் செயலாளர் யுவெட் கூப்பரைச் சந்தித்து இருதரப்பு உறவுகள் குறித்துப் பலதரப்பட்ட கலந்துரையாடல்களில் ஈடுபட்டுள்ளார்.
இச்சந்திப்பின் போது இலங்கையின் தற்போதைய அரசியல், பொருளாதார மாற்றங்கள் மற்றும் பிராந்திய பாதுகாப்பு குறித்து விரிவாக ஆராயப்பட்டது.
அண்மையில் இலங்கையைப் பாதித்த ‘டித்வா’ சூறாவளிப் பேரழிவைத் தொடர்ந்து, நாட்டின் மீள்கட்டுமானம் மற்றும் பொருளாதார மீட்சிப் பணிகளுக்காகப் பிரிட்டன் அரசு வழங்கி வரும் தொடர்ச்சியான நிதியுதவிகள் மற்றும் தொழில்நுட்ப ஒத்துழைப்புகளுக்குப் பிரதமர் ஹரிணி அமரசூரிய இலங்கையின் சார்பாகத் தனது நன்றியைத் தெரிவித்தார்.
அத்துடன், இலங்கை மற்றும் பிரிட்டன் ஆகிய இரு நாடுகளுக்கும் இடையிலான வர்த்தகத் தொடர்புகள் மற்றும் ஏற்றுமதி உத்திகளை மேம்படுத்துவதற்கு பிரிட்டன் வழங்கி வரும் பங்களிப்புகளையும் அவர் இதன்போது பாராட்டினார்.
இலங்கையின் தற்போதைய பொருளாதார வளர்ச்சிப் போக்குகள், புதிய அரசின் பிரதான கொள்கை முன்னுரிமைகள் குறித்துப் பிரிட்டன் இராஜதந்திரிகளுக்குப் பிரதமர் தெளிவுபடுத்தினார்.
குறிப்பாக, உள்நாட்டில் மனித உரிமைகளைப் பாதுகாப்பதிலும், நிலையான நல்லிணக்கத்தை ஊக்குவிப்பதிலும் தற்போதைய அரசு கொண்டுள்ள தீவிர கவனம் மற்றும் அர்ப்பணிப்புத் தன்மையை அவர் இச்சந்திப்பில் விவரித்தார்.
தற்போதைய உலகளாவிய புவிசார் அரசியல் நகர்வுகள் மற்றும் அதனால் சர்வதேச ரீதியாக வலுசக்தித் துறையில் ஏற்பட்டுள்ள சவால்கள் குறித்து இரு தரப்பினரும் நீண்ட நேரம் கருத்துப் பரிமாறிக் கொண்டனர்.
பிராந்திய தொடர்பாடல்களை வலுப்படுத்துவதன் மூலமும், நிலையான பசுமை ஆற்றல் வழிகளை உருவாக்குவதன் மூலமும் மட்டுமே நீண்டகால வலுசக்தி பாதுகாப்பை உறுதிப்படுத்த முடியும் என்பதன் முக்கியத்துவத்தை இரு தலைவர்களும் ஏற்றுக்கொண்டனர்.
இலங்கை மற்றும் பிரிட்டன் ஆகிய நாடுகளுக்கு இடையிலான நீண்டகால நட்புறவை மேலும் பலப்படுத்தும் நோக்கில் அமைந்த இராஜதந்திர மட்டத்திலான இச்சந்திப்பில், பிரிட்டனுக்கான இலங்கைத் தூதுவர் நிமல் சேனாதீர மற்றும் இலங்கைத் தூதரகத்தின் உயர் அதிகாரிகள் சிலரும் கலந்துகொண்டிருந்தனர்.
