கரவெட்டி பிரதேச சபையில் ஜனநாயகம் மீறப்படுகிறது: சபை உறுப்பினர் பகிரங்க குற்றச்சாட்டு!

கரவெட்டி பிரதேச சபையின் அண்மைக்கால நடவடிக்கைகள் மற்றும் சபை அமர்வுகளில் இடம்பெறும் சம்பவங்கள் தொடர்பில் மக்கள் உண்மைகளைத் தெரிந்துகொள்ள வேண்டும் எனச் சுட்டிக்காட்டி, சபையின் உறுப்பினர் ஒருவர் ஊடகவியலாளர் சந்திப்பொன்றை நடத்தியுள்ளார்

நிதி ஒதுக்கீடு மற்றும் அபிவிருத்தி முடக்கம்

கடந்த ஏப்ரல் 27ஆம் திகதி நடைபெற்ற மாதாந்த சபை அமர்வின் போது, 2026ஆம் ஆண்டுக்கான நிதியிலிருந்து 2 மில்லியன் ரூபாவை ஒதுக்கீடு செய்வதற்கான பிரேரணையைத் தவிசாளர் முன்மொழிந்திருந்தார். இதற்கு உறுப்பினர்கள் சம்மதம் தெரிவித்திருந்த போதிலும், சபையின் வருமானம் மற்றும் அபிவிருத்தி பணிகள் குறித்துக் கேள்வி எழுப்பப்பட்டதாக அவ்வுறுப்பினர் தெரிவித்தார்.

“இந்த ஆண்டின் முதல் காலாண்டில் மட்டும் கரவெட்டி பிரதேச சபைக்கு 31 கோடியே 89 இலட்சத்து 80 ஆயிரத்து 973 ரூபா 03 சதம் வருமானமாகக் கிடைத்துள்ளது. இரண்டாம் காலாண்டு தொடங்கி பாதியைக் கடந்த நிலையிலும், கரவெட்டி மக்களுக்குச் சேர வேண்டிய எந்தவொரு உருப்படியான அபிவிருத்திப் பணிகளும் தவிசாளரால் முன்னெடுக்கப்படவில்லை,” என அவர் குற்றம் சாட்டினார்.

சட்ட விதிமீறல்களும் அச்சுறுத்தல்களும்

அபிவிருத்தி குறித்துக் கேள்வி எழுப்பிய போது, தவிசாளர் சபையை 10 நிமிடங்கள் ஒத்திவைத்துவிட்டு வெளியேறியதாகவும், அதனைத் தொடர்ந்து பொலிஸார் வரவழைக்கப்பட்டு தம்மைக் கலைக்க முயற்சித்ததாகவும் உறுப்பினர் தெரிவித்தார்.

இது குறித்து அவர் மேலும் தெரிவிக்கையில்:

“1987ஆம் ஆண்டு 15ஆம் இலக்க பிரதேச சபைகள் சட்டத்தின்படி, ஒரு உறுப்பினரைச் சபையிலிருந்து வெளியேற்ற வேண்டுமானால் முறையான நடைமுறைகள் பின்பற்றப்பட வேண்டும். ஆனால், தவிசாளர் மற்றும் வருமான உத்தியோகத்தர் இணைந்து என்னை அச்சுறுத்தும் வகையில் சபையிலிருந்து வெளியேற்ற முயன்றனர். இது சபையின் நாகரிகத்திற்கும் சட்டத்திற்கும் முரணானது.”

தமது பாதுகாப்புக் கருதி இச்சம்பவத்தைத் தனது தொலைபேசியில் காணொளியாகப் பதிவு செய்துள்ளதாகவும், சபையின் செயலாளர் இவ்வாறான சட்டவிரோத நடவடிக்கைகளைத் தடுத்து நிறுத்தத் தவறிவிட்டதாகவும் அவர் கவலை வெளியிட்டார்.

பொய் முறைப்பாடுகளும் அதிகார துஷ்பிரயோகமும்

சம்பவம் தொடர்பாக நெல்லியடி பொலிஸ் நிலையத்தில் தனக்கெதிராகப் பொய் முறைப்பாடு செய்யப்பட்டுள்ளதாகத் தெரிவித்த உறுப்பினர், தாம் யாருக்கும் அச்சுறுத்தல் விடுக்கவில்லை என்பதைக் காணொளி ஆதாரங்கள் நிரூபிக்கும் என்றார்.

மேலும், சபையில் எழுப்பப்படும் 60 சதவீத வினாக்களுக்குத் தவிசாளருக்குப் பதிலாகச் செயலாளரே பதிலளிப்பதாகவும், தவிசாளர் தனது ஆளுமையைச் சரியாகப் பயன்படுத்தத் தவறிவிட்டு, சமூக வலைத்தளங்களில் மட்டும் விளம்பரம் தேடுவதாகவும் அவர் விமர்சித்தார்.

மக்களுக்கான கோரிக்கை

மத்திய அரசாங்கம் மற்றும் ‘நிவர்’ புயல் நிவாரணம் ஊடாகக் கிடைத்த நிதிகளைக் கொண்டு மேற்கொள்ளப்படும் பணிகளைத் தமது சொந்தப் பணிகள் போலக் காட்டி, தற்போதைய அரசியல் சூழலில் மக்களை ஏமாற்றும் நடவடிக்கைகளில் தமிழரசுக்கட்சி உறுப்பினர்கள் ஈடுபடுவதாக அவர் சாடினார். உண்மை நிலவரத்தைப் புரிந்துகொண்டு மக்கள் உரிய பாடம் புகட்ட வேண்டும் எனக் கேட்டுக்கொண்டு அவர் தனது உரையை நிறைவு செய்தார்.