மலேசியாவின் பட்டுபஹத் பகுதியில் வசிக்கும் இலங்கையர்களுக்காக ஏற்பாடு செய்யப்பட்ட சித்திரைப் புத்தாண்டு கொண்டாட்டங்கள் மிகச் சிறப்பான முறையில் அண்மையில் இடம்பெற்றன.
யுனிவசல் வருண இளைஞர் கழகத்தின் ஏற்பாட்டில் நடைபெற்ற இந்த விழாவில், மலேசியாவுக்கான இலங்கைத் தூதரகத்தின் உயர் அதிகாரிகள் பிரதம விருந்தினர்களாகக் கலந்துகொண்டு சிறப்பித்தனர்.
விழாவின் ஆரம்ப நிகழ்வாகப் பாரம்பரிய முறைப்படி பால் பொங்கி புத்தாண்டு கொண்டாட்டங்கள் உத்தியோகபூர்வமாகத் தொடங்கி வைக்கப்பட்டன.
தொடர்ந்து கயிறு இழுத்தல் உட்பட பல்வேறு பாரம்பரிய விளையாட்டு நிகழ்வுகள் இடம்பெற்றன. இதில் மலேசியாவில் வசிக்கும் ஏராளமான இலங்கையர்கள் ஆர்வத்துடன் பங்குபற்றினர்.
விழாவின் முக்கிய ஈர்ப்பாக அமைந்த ‘புத்தாண்டு அழகன் – அழகி’ தெரிவுப் போட்டி அனைவரினதும் கவனத்தை ஈர்த்தது. கடும் போட்டிக்கு மத்தியில் வெற்றியாளர்களாகப் பின்வருவோர் தெரிவு செய்யப்பட்டனர்.
புத்தாண்டு அழகன்: காலி மாவட்டத்தைச் சேர்ந்த 29 வயதான ரமேஸ் அஜந்த ஆண் அழகன் போட்டியில் முதலிடம் பெற்று மகுடம் சூடினார்.
புத்தாண்டு அழகி: பெண்களுக்கான அழகிப் போட்டியில் மிஷாந்தி கௌசல்யா முதலிடத்தைப் பெற்று மகுடம் சூடினார்.
இரண்டாம் இடம்: அழகிப் போட்டியில் நீர்கொழும்பைச் சேர்ந்த கிருஷ்ணன் தனுசியா இரண்டாம் இடத்தைப் பெற்றுக்கொண்டார்.
தொழில் நிமித்தம் மலேசியாவுக்குச் சென்று, புத்தாண்டு காலத்திலும் தமது சொந்த ஊர் மற்றும் உறவுகளுடன் கொண்டாட முடியாமல் இருந்த இலங்கையர்களுக்கு, யுனிவசல் வருண இளைஞர் கழகத்தின் இந்த முயற்சி ஒரு சொந்த மண்ணின் உணர்வைத் தந்திருந்தது. இந்த நிகழ்வு தமக்கு மிகுந்த மனமகிழ்ச்சியையும் உற்சாகத்தையும் அளித்ததாகப் பங்குபற்றியவர்கள் தெரிவித்தனர்.
