இல்-து-பிரான்ஸ் பகுதியில் அமைந்துள்ள செயின்-டெனிஸ் நகரில் நடைபெற்ற நகராட்சி தேர்தலில், பாலி பகயோகோ தலைமையிலான எல்.எஃப்.ஐ–கம்யூனிஸ்ட் கூட்டணி முதல் சுற்றிலேயே 50.77 சதவீத வாக்குகள் பெற்று வெற்றி பெற்றுள்ளது. தற்போதைய மேயராக இருந்த மாத்யூ ஹனோத்தான் 33 சதவீத வாக்குகளுடன் தோல்வியடைந்தார்.
இந்த வெற்றியின் மூலம், எல்.எஃப்.ஐ கட்சி இல்-து-பிரான்ஸ் பகுதியில் தனது மிகப்பெரிய நகராட்சியை கட்டுப்பாட்டுக்குள் கொண்டு வந்துள்ளது. சுமார் 1.5 இலட்சம் மக்கள்தொகையைக் கொண்ட செயின்-டெனிஸ் நகரம் வரலாற்றில் கம்யூனிஸ்ட் ஆதிக்கம் கொண்டதாக இருந்த போதிலும், 2020 ஆம் ஆண்டிலிருந்து சோசலிஸ்ட் கட்சியால் நிர்வகிக்கப்பட்டு வந்தது.
2025 ஆம் ஆண்டு பியர்ஃபிட்-சூர்-சேன் நகருடன் இணைக்கப்பட்டதன் பின்னர், இது பரிசுக்குப் பிறகு பெரிய நகரமாக உருவெடுத்துள்ளது. இந்தஇணைப்பை மீண்டும் பரிசீலிக்க மக்களின் கருத்தை கேட்க உள்ளதாக பாலி பகயோகோ தெரிவித்துள்ளார்.
53 வயதுடைய பாலி பகயோகோ, பொதுப் போக்குவரத்து நிறுவனத்தில் பணியாற்றிய அனுபவமுடையவர்.
தனது தேர்தல் அறிக்கையில் வீட்டு வாடகை கட்டுப்பாடு, மாணவர்களுக்கு மிதிவண்டி வழங்குதல், கல்வி உதவித்தொகைகள் வழங்குதல் போன்ற நலத்திட்டங்களை முன்வைத்துள்ளார். மேலும், நகராட்சி காவல்துறையை மக்களுடன் நெருக்கமாக செயல்படும் முறையாக மாற்ற வேண்டும் என்பதையும் வலியுறுத்தியுள்ளார்.
இந்தத் தேர்தல் கடும் பதற்ற சூழலில் நடைபெற்றது. இரு தரப்பினரும் பரஸ்பர குற்றச்சாட்டுகளை முன்வைத்ததுடன், வாக்குப்பதிவு நாளிலும் தேர்தல் முறைகேடு குறித்த குற்றச்சாட்டுகள் எழுந்தன. பல சர்ச்சைகள் மற்றும் அவதூறு குற்றச்சாட்டுகள் நிலவிய நிலையில், வாக்காளர் பங்கேற்பு குறைந்து, 57.16 சதவீதம் பேர் வாக்களிக்காமல் இருந்தது குறிப்பிடத்தக்கது.
