கனடாவின் கியூபெக் மாநில நிதியமைச்சர் எரிக் ஜிரார்ட் நாளை தனது எட்டாவது வரவு–செலவுத் திட்டத்தைச் சமர்ப்பிக்கவுள்ள நிலையில், அது தொடர்பான எதிர்பார்ப்பு மக்களிடையே அதிகரித்துள்ளது.வரவிருக்கும் தேர்தல் சூழ்நிலையிலும், இந்தத் திட்டம் கவர்ச்சிகரமான தேர்தல் வாக்குறுதிகளைக் கொண்டதாக இருக்காது என்றும், மிதமானதும் இலக்கு மையப்படுத்தப்பட்டதுமான திட்டமாக அமையும் என்றும் அவர் முன்கூட்டியே தெரிவித்துள்ளார்.
கடந்த நவம்பர் மாத மதிப்பீட்டின் படி, கியூபெக் மாநிலம் 12.4 பில்லியன் தொகை நிதிப் பற்றாக்குறையை எதிர்கொண்டு வருகிறது. இது மாநிலத்தின் மொத்த உள்நாட்டு உற்பத்தியின் 1.9 சதவீதமாகும். இந்த பற்றாக்குறையை 2029–30 நிதியாண்டுக்குள் முழுமையாக நீக்க அரசாங்கம் இலக்கு நிர்ணயித்துள்ளதுடன், அதற்கான நடைமுறைகள் குறித்து இன்னும் முழுமையான தெளிவு இல்லை என தணிக்கையாளர் தரப்பு கவலைவெளியிட்டுள்ளது.
மேலும், 2026 ஆம் ஆண்டு கியூபெக் மற்றும் கனடா முழுவதும் பொருளாதார ரீதியில் சவாலானதாக இருக்கும் என நிதியமைச்சர் எச்சரித்துள்ளார். வட அமெரிக்க வர்த்தக ஒப்பந்தத்திலிருந்து அமெரிக்கா விலகும் சாத்தியம் இருந்தால், அது பரந்த பொருளாதார வீழ்ச்சியை ஏற்படுத்தக்கூடும் எனவும் குறிப்பிடப்பட்டுள்ளது.
இந்நிலையில், உலகளாவிய போர்ச் சூழ்நிலைகளும் பொருளாதாரத்தில் கூடுதல் அழுத்தத்தை ஏற்படுத்தி வருகின்றன. எனினும், சுகாதாரம் மற்றும் கல்வித் துறைகளுக்கு போதுமான நிதி ஒதுக்கப்படும் எனவும், உள்கட்டமைப்பு மேம்பாட்டிற்கான முதலீடுகளுக்கும் முன்னுரிமை வழங்கப்படும் எனவும் நிதியமைச்சர் உறுதியளித்துள்ளார்.
