இஸ்ரேல் பிரதமர் பெஞ்சமின் நேதன்யாகு கொல்லப்பட்டதாக சமூக ஊடகங்களில் பரவி வரும் தகவல்கள் பொய்யானவை என இஸ்ரேல் பிரதமர் அலுவலகம் தெரிவித்துள்ளது. பிரதமர் நலமுடன் உள்ளார் என்றும் அதிகாரப்பூர்வமாக விளக்கம் அளிக்கப்பட்டுள்ளது.
இஸ்ரேலும் அமெரிக்காவும் இணைந்து கடந்த பிப்ரவரி 28ஆம் தேதி ஈரான் மீது தாக்குதலை தொடங்கிய நிலையில், அதற்கு பதிலாக ஈரானும் தாக்குதல்களை மேற்கொண்டு வருகிறது. இந்தப் போர்ச் சூழலில் பல்வேறு வதந்திகளும் சமூக ஊடகங்களில் பரவி வருகின்றன.
அத்தகைய வதந்திகளில் ஒன்றாக, இஸ்ரேல் பிரதமர் பெஞ்சமின் நேதன்யாகு படுகொலை செய்யப்பட்டதாக தகவல்கள் வெளியானது. இதனுடன் தொடர்புடையதாக பரவிய ஒரு காணொளியில், அவருக்கு ஒரு கையில் ஆறு விரல்கள் இருப்பது போல காட்சிப்படுத்தப்பட்டிருந்தது.
இதுகுறித்து இஸ்ரேல் பிரதமர்அலுவலகம் வெளிநாட்டு செய்தி நிறுவனத்துக்கு வழங்கிய விளக்கத்தில், “நேதன்யாகு படுகொலை செய்யப்பட்டார் என்ற சமூக ஊடகச் செய்திகள் முற்றிலும் பொய்யானவை. பிரதமர் நலமுடன் உள்ளார்” என்று தெரிவித்துள்ளது.
மேலும், நேதன்யாகுவின் மகன் யய்ர் நேதன்யாகுவின் சமூக ஊடகக் கணக்கில் சமீப நாட்களில் பதிவுகள் இல்லாததை காரணமாகக் கொண்டு சிலர் வதந்திகளை பரப்பியதாகவும் கூறப்படுகிறது. அவர் கடைசியாக மார்ச் 9ஆம் தேதி பதிவிட்டது உண்மைதான் என்றாலும், அதனால் வதந்திகள் உண்மை ஆகிவிடாது என்றும் பிரதமர் அலுவலகம் தெளிவுபடுத்தியுள்ளது.
