ஈரான் மீது அமெரிக்கா மற்றும் இஸ்ரேல் மேற்கொண்டு வரும் போர் இன்னும் சில வாரங்கள் தொடர்ந்தால் உலக சந்தையில் மசகு எண்ணெய் விலை ஈடு செய்ய முடியாத அளவிற்கு உயரக்கூடும் என சர்வதேச பொருளாதார நிபுணர்கள் எச்சரித்துள்ளனர்.
தற்போது ஒரு பீப்பாய் மசகு எண்ணெய் சுமார் 100 டொலராக விற்பனை செய்யப்படும் நிலையில், போர் நீடித்தால் அது 120 டொலர் முதல் 150 டொலர் வரை உயரக்கூடும் என தெரிவிக்கப்படுகிறது.
போர் உடனடியாக நிறுத்தப்பட்டாலும் சந்தை மீண்டும் இயல்பு நிலைக்குத் திரும்ப பல மாதங்கள் ஆகும் எனவும் நிபுணர்கள் சுட்டிக்காட்டுகின்றனர். ஈரான் போர்நிறுத்தத்தை அறிவித்து கப்பல்களைத் தாக்குவதை நிறுத்தினாலும், சந்தை முழுமையாக நிலைநிறுத்தப்படுவது எளிதானதாக இருக்காது என்றும் கூறப்பட்டுள்ளது.
எண்ணெய் விலை 150 டொலரை எட்டினால் எரிபொருளை வாங்க முடியாத நிலை உருவாகி, சந்தையில் அதன் தேவை தானாகவே குறையக்கூடும் என்றும் தெரிவிக்கப்படுகிறது. இதன் விளைவாக உலக நாடுகளின் பொருளாதாரம் கடுமையாக பாதிக்கப்பட்டு வளர்ச்சி மந்தமடையும் அபாயமும் உள்ளது.
இதற்கிடையில் எண்ணெயை விட இயற்கை எரிவாயு சந்தை மிகவும் மோசமான நிலையை எதிர்கொண்டுள்ளதாகவும் கூறப்படுகிறது. கட்டார் நாடு தனது உற்பத்தியை நிறுத்த வேண்டிய சூழ்நிலைக்குத் தள்ளப்பட்டுள்ளதால், உலகின் சுமார் 20 சதவீத திரவமாக்கப்பட்ட இயற்கை எரிவாயு விநியோகம் தற்போது பாதிக்கப்பட்டுள்ளதாக நிபுணர்கள் தெரிவித்துள்ளனர்.இந்த நிலைக்கு குறுகிய காலத்தில் மாற்று தீர்வுகளை கண்டுபிடிப்பது மிகவும் கடினம் என்றும் சர்வதேச பொருளாதார நிபுணர்கள் எச்சரித்துள்ளனர்.
