அமெரிக்க விமானப்படைக்கு சொந்தமான KC-135 ஸ்ட்ராடோடேங்கர் வகை விமானம் மேற்கு ஈராக்கில் விபத்துக்குள்ளானதாக அமெரிக்க மத்திய கட்டளை நிலையம் அறிவித்துள்ளது.“ஒபரேஷன் எபிக் ஃப்யூரி” என்ற நடவடிக்கையின் போது நட்பு வான்வெளியில் இந்த சம்பவம் இடம்பெற்றதாகவும், மீட்பு நடவடிக்கைகள் தொடர்ந்து நடைபெற்று வருவதாகவும் மத்திய கட்டளை நிலையம் வெளியிட்ட அறிக்கையில் தெரிவிக்கப்பட்டுள்ளது.
வானில் பறக்கும் மற்ற விமானங்களுக்கு எரிபொருள் நிரப்பும் பணியில் இரண்டு விமானங்கள் ஈடுபட்டிருந்ததாகவும், அவற்றில் ஒன்று மேற்கு ஈராக்கில் விபத்துக்குள்ளானதாகவும் கூறப்படுகிறது. மற்றொரு விமானம் பாதுகாப்பாக தரையிறங்கியதாகவும் அதிகாரிகள் தெரிவித்துள்ளனர்.
விபத்துக்குள்ளான இந்த சம்பவத்தில் உயிரிழப்புகள் ஏற்பட்டுள்ளனவா என்பது இதுவரை உறுதியாகத் தெரியவில்லை. மீட்பு நடவடிக்கைகள் தொடர்ந்து நடைபெற்று வருவதால் நிலைமை குறித்து முழுமையான தகவல்கள் இன்னும் வெளியாகவில்லை எனவும் அமெரிக்க அதிகாரிகள் தெரிவித்துள்ளனர்.பாதுகாப்பாக தரையிறங்கிய இரண்டாவது விமானமும் KC-135 வகையைச் சேர்ந்ததாகவும் குறிப்பிடப்பட்டுள்ளது.
