உலகில் மிக உயர்ந்த வலிமை கொண்டதாகக் கருதப்படும் T1200 தரத்திலான கார்பன் நார் பொருளை சீனா அதிகாரப்பூர்வமாக அறிமுகப்படுத்தியுள்ளது. மிகுந்த வலிமையும் இலகுவான தன்மையும் கொண்ட இந்த புதிய பொருள் விண்வெளி தொழில்நுட்பம் உள்ளிட்ட பல முன்னேற்றத் துறைகளில் பயன்படுத்தப்படவுள்ளதாக தெரிவிக்கப்படுகிறது.
இந்த T1200 கார்பன் நார் பொருளை சீன அரசுக்கு சொந்தமான கட்டுமானப் பொருள் நிறுவனம் தன்னிச்சையாக உருவாக்கியுள்ளது. தற்போது இது தொழில்துறை உற்பத்திக்குள் கொண்டுவரப்பட்டுள்ளதுடன், ஆண்டுதோறும் தொன் கணக்கில் உற்பத்தி செய்யும் திறன் கொண்டதாகவும் கூறப்படுகிறது.
இதன் மூலம் இத்தரமான கார்பன் நாரை பெருமளவில் உற்பத்தி செய்யும் உலகின் முதல் நாடாக சீனா மாறியுள்ளது.இந்த கார்பன் நார் மிகவும் இலகுவானதுடன் மிகுந்த வலிமையையும் கொண்டதாகும். இதன் விட்டம் மனித தலைமுடியின் விட்டத்தை விட பத்தில் ஒரு பகுதியை விடவும் குறைவாக இருப்பதாக தெரிவிக்கப்படுகிறது.
மேலும் இதன் அடர்த்தி எஃகின் அடர்த்தியின் நான்கில் ஒரு பகுதி மட்டுமே ஆகும். ஆனால் இதன் இழுவை வலிமை எஃகை விட சுமார் பத்து மடங்கு அதிகமாக உள்ளதாக விஞ்ஞானிகள் குறிப்பிட்டுள்ளனர்.இந்த புதிய பொருள் விண்வெளி தொழில்நுட்பம், குறைந்த உயர விமான சேவைகள், மனித வடிவ இயந்திரங்கள் உள்ளிட்ட பல மேம்பட்ட தொழில்நுட்ப துறைகளில் பயன்படுத்தப்படவுள்ளது.
இதற்கு முன்பு சீனா T300 முதல் T1000 வரையிலான பல தரங்களில் கார்பன் நார்களை உருவாக்கியிருந்தது. அவை ஒவ்வொன்றும் முன்னையதை விட அதிக வலிமை கொண்டதாகும். தற்போது அறிமுகப்படுத்தப்பட்டுள்ள T1200 தரம், அந்த முன்னேற்றப் பயணத்தின் முக்கியமான புதிய கட்டமாகக் கருதப்படுகிறது.இதில் “1200” என்ற எண் அந்த நாரின் வலிமை அளவைக் குறிக்கிறது.
கார்பன் நார் கலவைகள் உயர்ந்த வலிமை-எடை விகிதம் கொண்டதால், விண்கலங்களின் கட்டமைப்பு பொருளாக பரவலாக பயன்படுத்தப்படுகின்றன. சீனாவின் வர்த்தக விண்வெளி நிறுவனம் உருவாக்கிய வெய்குவாங்-1 என்ற திரவ ஏவுகணை வாகனத்தின் உடல் அமைப்பில் சுமார் 90 சதவீதம் கார்பன் நார் கலவைகள் பயன்படுத்தப்பட்டுள்ளன. இதன் மூலம் பாரம்பரிய உலோக அமைப்புகளை ஒப்பிடுகையில் ஏவுகணையின் எடை 25 முதல் 30 சதவீதம் வரை குறைக்கப்பட்டுள்ளதாக தெரிவிக்கப்படுகிறது.
விண்கலங்களின் எடையை குறைப்பது, விண்வெளி ஏவுதலுக்கான செலவைக் குறைக்கும் முக்கியமான வழிகளில் ஒன்றாகக் கருதப்படுகிறது. குறிப்பாக, பெருமளவில் செயற்கைக்கோள் தொகுதிகளை விண்வெளியில் அமைக்கும் முயற்சிகளில் இலகுவான மற்றும் வலிமையான பொருட்களின் பயன்பாடு மிக முக்கியமானதாகும்.
புதிய T1200 கார்பன் நார் தொழில்நுட்பம், எதிர்காலத்தில் சீனாவின் விண்வெளி மற்றும் மேம்பட்ட தொழில்நுட்பத் துறைகளில் மேலும் பல முன்னேற்றங்களை ஏற்படுத்தும் என எதிர்பார்க்கப்படுகிறது.
