வேல்ஸ் நாடாளுமன்ற தேர்தலை முன்னிட்டு வேல்ஸ் கன்சர்வேடிவ் கட்சி அதிரடி தேர்தல் அறிக்கை ஒன்றை வெளியிட்டுள்ளது!
வேல்ஸ் நாடாளுமன்றத் தேர்தலை முன்னிட்டு, கன்சர்வேடிவ் கட்சி தனது தேர்தல் அறிக்கையை அதிகாரப்பூர்வமாக வெளியிட்டுள்ளது.
எதிர்வரும் மே 7 ஆம் திகதி நடைபெறவுள்ள வேல்ஸ் நாடாளுமன்றத் தேர்தலை முன்னிட்டு, அக்கட்சியின் தேர்தல் அறிக்கை இன்று வெளியிடப்பட்டது.
கட்சித் தலைவர் டேரன் மில்லர், கடினமாக உழைக்கும் மக்களின் கைகளில் அதிக வருமானம் நிலைத்திருக்கச் செய்வதே தமது முக்கிய நோக்கம் என தெரிவித்துள்ளார்.அதன்படி, அடிப்படை வருமான வரியை ஒரு பென்னி அளவு குறைப்பதன் மூலம் ஒரு சராசரி குடும்பத்திற்கு ஆண்டுக்கு 450 பவுண்டு வரை சேமிப்பு கிடைக்கும் எனக் கட்சி உறுதியளித்துள்ளது.
மேலும், வீடுகளுக்கான முத்திரை வரியை ரத்து செய்தல், 5 சதவீதத்தை மீறி உள்ளூராட்சி வரி உயர்த்த வேண்டுமானால் அதற்கு மக்களிடம் வாக்கெடுப்பு நடத்துதல், முக்கிய நெடுஞ்சாலைகளில் நெரிசலைக் குறைக்கும் புதிய சாலை அமைத்தல் மற்றும் பிரதான சாலைகளை மேம்படுத்துதல் உள்ளிட்ட திட்டங்களும் முன்வைக்கப்பட்டுள்ளன.
அத்துடன், அறிவியல் மற்றும் தொழில்நுட்பப் பாடப்பிரிவுகளில் கல்வி கற்கும் மாணவர்களுக்கு 1,000 பவுண்டு கல்விக் கட்டணத் தள்ளுபடி வழங்குதல், வேல்ஸில் கல்வி கற்று அங்கு ஐந்து ஆண்டுகள் பணியாற்றும் செவிலியர் மற்றும் மருத்துவர்களுக்கு முழுமையான கல்விக் கட்டணத்தை மீள வழங்குதல் ஆகிய வாக்குறுதிகளும் அறிவிக்கப்பட்டுள்ளன.
தொழில் வளர்ச்சியை ஊக்குவிக்கும் வகையில் வேல்ஸ் மேம்பாட்டு முகமை மீண்டும் நிறுவப்படும் என்றும், விவசாயிகளுக்கான நிதி ஒதுக்கீடு 100 மில்லியன் பவுண்டாக அதிகரிக்கப்படும் என்றும் தெரிவிக்கப்பட்டுள்ளது.மேலும், பெரிய அளவிலான காற்றாலை மற்றும் சூரிய மின்சக்தி நிலையங்களுக்கு கட்டுப்பாடுகள் விதிக்கப்படும் எனவும் கட்சி குறிப்பிட்டுள்ளது.
தற்போதைய கருத்துக்கணிப்புகளில் அக்கட்சி நான்காவது இடத்திற்குத் தள்ளப்படலாம் எனக் கூறப்படும் நிலையில், இத்தேர்தல் அறிக்கை வெளியாகியுள்ளது.மற்ற கட்சிகளுக்கு வாக்களிப்பது பழைய நிலைமையைத் தொடரச் செய்யும் எனத் தெரிவித்த டேரன் மில்லர், மாற்றத்தை உருவாக்கக்கூடிய திறன் தமது கட்சியிடமே உள்ளதாகவும் குறிப்பிட்டுள்ளார்.
