அயதுல்லா அலி கொமேனி படுகொலை செய்யப்பட்டதாக வெளியான தகவலைத் தொடர்ந்து மத்திய கிழக்கு பிராந்தியத்தில் பதற்றம் தீவிரமடைந்துள்ளது. இதன் பின்னணியில், சர்வதேச வர்த்தகத்தில் முக்கியப் பங்கு வகிக்கும் ஹோர்முஸ் நீரிணை மூடப்படுவதாக ஈரான் அதிகாரபூர்வமாக அறிவித்துள்ளது.
ஹோர்முஸ் நீரிணை வழியாகச் செல்ல முயலும் எந்தவொரு கப்பலும் ஈரானிய ஆயுதப்படைகளின் இலக்காகக் கருதப்படும் என்றும், அவற்றுக்கு எதிராக கடுமையான தாக்குதல்கள் நடத்தப்படும் என்றும் எச்சரிக்கை விடுக்கப்பட்டுள்ளது.தமது உச்சத் தலைவரின் படுகொலைக்கு பதிலடியாக, அமெரிக்கா மற்றும் இஸ்ரேல் ஆகிய நாடுகளின் இலக்குகளை நோக்கி தொடர்ச்சியான தாக்குதல்கள் முன்னெடுக்கப்பட்டு வருவதாகவும் தகவல்கள் தெரிவிக்கின்றன.
உலகளாவிய மசகு எண்ணெய் விநியோகத்தில் ஹோர்முஸ் நீரிணை முக்கியப் பாதையாக இருப்பதால், அதன் மூடல் சர்வதேச சந்தைகளில் கடுமையான பொருளாதார அதிர்வுகளை ஏற்படுத்தக்கூடும் என அஞ்சப்படுகிறது.“எமது இறையாண்மைக்கு விடுக்கப்பட்ட சவாலுக்குப் பதிலடியாகவே இந்தத் தீர்மானம் எடுக்கப்பட்டுள்ளது” என ஈரான் ஆயுதப்படைகள் தரப்பில் இருந்து வெளியான அறிக்கையில் குறிப்பிடப்பட்டுள்ளது.
இந்நிலையில், ஈரான் மற்றும் அதனுடன் இணைந்த நாடுகள் அமெரிக்கா மற்றும் இஸ்ரேலுக்கு எதிராக கடுமையான நிலைப்பாட்டை எடுத்துள்ளதாகவும், பிராந்தியத்தில் முழுமையான போர் சூழல் உருவாகும் அபாயம் இருப்பதாகவும் சர்வதேச கவனம் திரும்பியுள்ளது.
