தலைமன்னார் கடற்பரப்பில் கைது செய்யப்பட்ட தமிழக மீனவர்கள் பத்து பேரையும் விளக்கமறியலில் வைக்க நீதிமன்றம் உத்தரவு.!

இலங்கை கடற்பரப்பில் அத்துமீறி நுழைந்து மீன்பிடியில் ஈடுபட்டதாகக் குற்றம்சாட்டப்பட்ட 10 தமிழக மீனவர்களை எதிர்வரும் மார்ச் 05, 2026 வரை விளக்கமறியலில் வைக்க மன்னார் நீதிமன்றம் இன்று (19) உத்தரவிட்டுள்ளது.தமிழகத்தைச் சேர்ந்த குறித்த மீனவர்கள் இரு படகுகளில் மீன்பிடிக்கச் சென்ற நிலையில், இலங்கை கடற்பரப்பை மீறி நுழைந்ததாக தெரிவிக்கப்படுகிறது.

கடல் ரோந்து பணியில் ஈடுபட்டிருந்த இலங்கை கடற்படை அதிகாரிகள், 10 பேரையும் கைது செய்ததுடன், அவர்கள் பயணித்த இரண்டு படகுகளையும் கைப்பற்றி தலைமன்னார் கடற்படை முகாமிற்கு கொண்டு சென்றனர்.தொடர்ந்து விசாரணைகள் மேற்கொள்ளப்பட்ட பின்னர், மீனவர்கள் மன்னார் கடற்தொழில் திணைக்கள அதிகாரிகளிடம் ஒப்படைக்கப்பட்டனர்.

அங்கு நடைபெற்ற மேலதிக விசாரணைகளுக்குப் பின்னர், அவர்கள் மன்னார் நீதிமன்றத்தில் ஆஜர்படுத்தப்பட்டனர்.வழக்கை பரிசீலித்த மன்னார் நீதவான், குறித்த 10 மீனவர்களையும் மார்ச் 05 ஆம் திகதி வரை விளக்கமறியலில் வைக்க உத்தரவிட்டார்.