சம்பள உயர்வு தொழிலாளர்களுக்கு பாகுபாடின்றி வழங்கப்பட வேண்டும்- மனோ, திகா எம்.பிக்கள் வலியுறுத்து !

தோட்டத் தொழிலாளர்களுக்கான இந்த மாத சம்பள உயர்வு ரூ.400 அடுத்த மாதம் வழங்கப்படவுள்ளதாக அறிவிக்கப்பட்டுள்ள நிலையில், இந்த உயர்வு 3 அரசாங்க பெருந்தோட்ட நிறுவனங்கள், 22 தனியார் தோட்ட நிறுவனங்கள், சிறு தோட்ட உடைமையாளர் தோட்டங்கள் மற்றும் தனியார் சிறு தோட்டங்கள் ஆகிய நான்கு பிரிவுகளிலும் தொழில் புரியும் அனைத்து தொழிலாளர்களுக்கும் வழங்கப்பட வேண்டும் என தமிழ் முற்போக்குக் கூட்டணியின் தலைவர் மனோ கணேசன் எம்.பி. வலியுறுத்தியுள்ளார்.

நாடாளுமன்ற வளாகத்தில் நடைபெற்ற தொழில் அமைச்சின் அமைச்சக ஆலோசனைக் கூட்டத்தில் கலந்து கொண்டு கருத்துத் தெரிவித்த அவர்,
“கடந்த வரவு – செலவுத் திட்டத்தின் இரண்டாம் வாசிப்பின் போது, அரசுக்கு ஆதரவாக தமிழ் முற்போக்குக் கூட்டணி எம்பிக்கள் வாக்களித்தோம். அந்த வாக்கெடுப்பின் போதே இந்த ரூ.400 சம்பள உயர்வு அனைத்து தோட்டத் தொழிலாளர்களுக்கும் வழங்கப்பட வேண்டும் என்பதைக் கூறித்தான் நான் வாக்களித்தேன்.

இப்போதும் அதையே தொழில் அமைச்சர் அணில் ஜயந்த பெர்னாண்டோ மற்றும் பிரதி அமைச்சர் மஹிந்த ஜயசிங்க ஆகியோரின் கவனத்திற்கு கொண்டு வருகின்றேன்” என்று தெரிவித்தார்.இந்தக் கூட்டத்தில் தொழில் அமைச்சர் அணில் ஜயந்த பெர்னாண்டோ, பிரதி அமைச்சர் மஹிந்த ஜயசிங்க, மனோ கணேசன் எம்.பி., திகாம்பரம் எம்.பி., கலைச்செல்வி எம்.பி. உட்பட பலர் கலந்து கொண்டனர்.இதுதொடர்பாக தமிழ் முற்போக்குக் கூட்டணியின் ஊடக செயலகம் வெளியிட்டுள்ள அறிக்கையில்,
“இந்தக் கலந்துரையாடலில் கலந்து கொண்ட திகாம்பரம் எம்.பி., அரசின் ரூ.200 சம்பள உயர்வு கிடைக்கும் என எண்ணுவதாகவும், ஆனால் கம்பனித் தோட்டங்களில் தொழிலாளர்கள் கொண்டு வர வேண்டிய கொழுந்து நிறை தொடர்பில் இப்போதே சர்ச்சை எழுந்துள்ளதாகவும் கூறினார். வழமையை விட அதிக கொழுந்து நிறை கொண்டு வர வேண்டும்.

இல்லாவிட்டால் முழு நாள் சம்பளம் வழங்கப்படமாட்டாது என கம்பனிகள் தொழிலாளர்களிடம் தெரிவித்து வருவதாகவும் அவர் சுட்டிக்காட்டினார். இதை அரசு கவனத்தில் எடுக்காவிட்டால், அறிவிக்கப்பட்ட ரூ.400 சம்பள உயர்வு நடைமுறையில் கிடைக்காது என்றும் அவர் தெரிவித்தார்” என குறிப்பிடப்பட்டுள்ளது.

இதனையடுத்து மீண்டும் கருத்துத் தெரிவித்த மனோ கணேசன் எம்.பி.,“எல்லா காலத்திலும், எல்லாப் பிராந்தியங்களிலும் ஒரே மாதிரியான கொழுந்து கிடைப்பதில்லை. அதைக் காரணம் காட்டி நிறுவனங்கள் சம்பளத்தைக் குறைத்து வழங்கி விளையாடாமல், அரசே கண்காணிக்க வேண்டும். இது தொழில் அமைச்சின் பொறுப்பாகும். குறிப்பாக அமைச்சர் அணில் ஜயந்த பெர்னாண்டோ மற்றும் பிரதி அமைச்சர் மஹிந்த ஜயசிங்க ஆகியோர் இதனை உரிய முறையில் கவனத்தில் எடுப்பார்கள் என நம்புகின்றேன்” என்று தெரிவித்தார்.