உள்ளடக்கத்திற்குச் செல்க
நவம்பர் 2026
10 செவ்வாய்
4210 பேர் இப்போது பார்க்கின்றனர்

புதிய இரு சட்டங்கள் மூலம் மக்கள் மீது திட்டமிட்டு அரச பயங்கரவாதம் திணிப்பு!: சஜித் குற்றச்சாட்டு

இலங்கை செய்திகள் 1 வாரம் முன்
106 பார்வைகள்

நாட்டில் இரு புதிய சட்டமூலங்களைக் கொண்டுவந்து, அரசு சட்டபூர்வமான முறையில் மக்கள் மீது அரச பயங்கரவாதத்தைத் திணிக்க முயல்கின்றது என்று எதிர்க்கட்சித் தலைவர் சஜித் பிரேமதாஸ கடும் குற்றச்சாட்டை முன்வைத்தார்.

பொலன்னறுவை மாவட்டம், கல்லெல குசும்மகம ஸ்ரீ சுபோதிராஜாராம விகாரையின் அபிவிருத்திப் பணிகளுக்காகச் சீமெந்து மூட்டைகளை வழங்கி வைக்கும் புண்ணிய நிகழ்வில் இன்று ஞாயிற்றுக்கிழமை கலந்துகொண்டு உரையாற்றும்போதே அவர் மேற்கண்டவாறு தெரிவித்தார்.

ஐக்கிய மக்கள் சக்தியின் அங்கத்தவர் விரிவாக்க வேலைத்திட்டத்தில் பங்கேற்பதற்காக பொலன்னறுவை மாவட்டத்துக்கு விஜயம் மேற்கொண்டிருந்த நிலையிலேயே எதிர்க்கட்சித் தலைவர் இந்த நிகழ்வில் பங்கேற்றிருந்தார்.

அரசின் புதிய சட்ட மூலங்கள் குறித்து சஜித் பிரேமதாஸ மேலும் சுட்டிக்காட்டுகையில்,

“ஒவ்வொரு குடிமகனுக்கும் மதச் சுதந்திரம், சித்தாந்த சுதந்திரம், அரசியல் உரிமை மற்றும் கருத்துச் சுதந்திரத்துடன் அமைதியான முறையில் போராட்டம் நடத்தும் அடிப்படை உரிமைகள் காணப்படுகின்றன. ஆனால், அரசு கொண்டுவந்துள்ள புதிய சட்டமூலங்கள் மக்களின் இந்தச் சுதந்திரத்தைப் பறிக்கின்றன.

பயங்கரவாதத்திலிருந்து அரசைப் பாதுகாத்தல் மற்றும் ஒழுங்கமைக்கப்பட்ட குற்றச்செயல்களைத் தடுத்தல் என்ற பெயரில் கொண்டுவரப்பட்டுள்ள இரு சட்டங்கள் மூலம் நீதிமன்ற அதிகாரங்கள் குறைக்கப்பட்டு, பயங்கரவாதி யார் என்பதைத் தீர்மானிக்கும் அதிகாரம் நிறைவேற்று அதிகாரத்துக்கு வழங்கப்பட்டுள்ளது.

மக்கள் அணியும் ஆடை, சிகை அலங்காரம், பச்சைக்குத்துதல் என்பவற்றை அடிப்படையாகக் கொண்டு எவரையும் பயங்கரவாதியாகவும், குற்றவாளியாகவும் முத்திரை குத்தும் அதிகாரத்தை அரசு கையில் எடுத்துள்ளது. இது 220 இலட்சம் மக்கள் மீது சட்டபூர்வமாக அரச பயங்கரவாதத்தைத் திணிப்பதாகும்.” – என்றார்.

அரசின் அரசியல் உள்நோக்கம் குறித்து அவர் பேசுகையில்,

“பயங்கரவாதத்திலிருந்து நாட்டைக் காப்பாற்ற சர்வதேச உடன்படிக்கைகளுக்கு அமையத் தயாரிக்கப்பட்ட சட்டங்களே அவசியமாகும். ஆனால் தற்போதைய அரசு மக்களின் மனித உரிமைகளைப் பாதுகாப்பதற்குப் பதிலாக, அவற்றை மீறித் தனி கட்சி ஆட்சியை ஸ்தாபித்து ஜனநாயகத்தை அழிப்பதையே நோக்கமாகக் கொண்டு இயங்கி வருகின்றது.

புத்த சாசனத்துக்கு அரசமைப்பில் வழங்கப்பட்டுள்ள விசேட அந்தஸ்தைப் போன்று ஏனைய மதங்களுக்கும் உரிய அங்கீகாரம் வழங்கப்பட வேண்டும். மறைந்த முன்னாள் ஜனாதிபதி ரணசிங்க பிரேமதாஸ புத்த சாசன அமைச்சை உருவாக்கியதுடன் ஏனைய மதங்களுக்கும் இராஜாங்க அமைச்சுகளை அமைத்தார். ஆனால் தற்போதைய ஆட்சியாளர்கள் அவற்றை திணைக்களங்களாகச் சுருக்கியதுடன், பிக்குகளின் காவி உடையிலும் கை வைக்கும் அளவிற்குச் சென்றுள்ளனர்.

வெறும் கோஷமிடும் ‘காட்போர்ட் பௌத்தர்களைப்’ போல் நாங்கள் மதத்தை வைத்து அரசியல் செய்யவில்லை. இனவாதம் மற்றும் மதவாதத்தை நிராகரித்து முற்போக்குத் தேசியவாதத்தையே நாம் முன்னெடுக்கின்றோம்.” – என்றார்.

உள்நாட்டு மற்றும் வெளிநாட்டு செய்திகளை உடனுக்குடன் அறிந்துகொள்ள WHATSAPP CHANNEL இணையுங்கள்
மேலும் செய்திகளைப் படிக்க இங்கே அழுத்தவும்

விளம்பரம்

தொடர்புடைய செய்திகள் NEW

இலங்கை செய்திகள்

ருவன்வெலிசாய விகாரை வளாகத்தில் பதற்றம்!

அனுராதபுரம் வரலாற்றுச் சிறப்புமிக்க ருவன்வெலிசாய விகாரைக்கு முன்பாக முன்னெடுக்கப்பட்ட சத்யாகிரகப் போராட்டத்தின்போது, அங்கு வந்த நபர் ஒருவருக்கும் தேரர்களுக்கும் இடையில் கடுமையான வாக்குவாதம் ஏற்பட்டு பதற்றமான நிலைமை…

66 0 0
இலங்கை செய்திகள்

யாழ். நவீன சந்தைக் கட்டடத் தொகுதியில் அவதானிக்கப்பட்டுள்ள குறைபாடுகளை நிவர்த்தி செய்க – ஆளுநர் பணிப்புரை!

யாழ்ப்பாணம் நவீன சந்தைக் கட்டடத் தொகுதியில் அவதானிக்கப்பட்டுள்ள குறைபாடுகளை நிர்ணயிக்கப்பட்ட கால எல்லைக்குள் சீர்செய்யுமாறும், நீண்டகால நோக்கில் நகர அபிவிருத்தி அதிகார சபை உள்ளிட்ட தொடர்புடைய தரப்பினரின்…

76 0 0
இலங்கை செய்திகள்

தமிழீழ விடுதலை இயக்க அமைப்பாளரிடம் 3 மணித்தியாலங்களிற்கும் அதிகமாக பயங்கரவாத தடுப்பு பிரிவினர் விசாரணை!

கிளிநொச்சி மாவட்ட தமிழீழ விடுதலை இயக்க அமைப்பாளர் கனகசபை  கணேசகுமாரன்  மீது 3:30 மணி நேரம் யாழ்ப்பாணம் பயங்கரவாத தடுப்பு பிரிவினரால்  விசாரணைக்கு உட்படுத்தப்பட்டுள்ளார். யாழ்ப்பாணம் –…

76 0 0
இலங்கை செய்திகள்

கதிரியக்கவியலாளர் பதவி நிலை உள்ளீர்ப்பு வர்த்தமானிக்கு எதிராக மனித உரிமைகள் ஆணைக்குழுவில் முறைப்பாடு

பேராதனைப் பல்கலைக்கழகத்தில் கதிரியக்கவியலாளர் (Radiographer) பதவி நிலைக்கான பட்டப்படிப்பை வெற்றிகரமாக நிறைவு செய்துள்ள பட்டதாரிகளைச் சேவையில் உள்ளீர்ப்பதற்காக வெளியிடப்பட்ட புதிய வர்த்தமானி அறிவித்தலுக்கு எதிராக, இலங்கை மனித…

71 0 0