களுத்துறை, நாகொட பகுதியில் பொலிஸாரின் உத்தரவை மீறி பயணித்த முச்சக்கரவண்டி மீது நடத்தப்பட்ட துப்பாக்கிச் சூட்டில் அதன் சாரதி காயமடைந்துள்ளார்.
காயமடைந்தவர் களுத்துறை, ரஜவத்த பகுதியைச் சேர்ந்தவரும், திட்டமிட்ட குற்றச்செயல்களுடன் தொடர்புடையவர் எனச் சந்தேகிக்கப்படுபவருமான ‘ரஜவத்த சஞ்சு’ என அடையாளம் காணப்பட்டுள்ளார்.
களுத்துறை குற்றத்தடுப்புப் பிரிவு பொலிஸார், போபுவல பகுதியில் சந்தேகத்திற்கிடமான முச்சக்கரவண்டி ஒன்றை நிறுத்துமாறு சமிக்ஞை செய்துள்ளனர்.
எனினும், பொலிஸாரின் உத்தரவைப் பொருட்படுத்தாமல் சாரதி தொடர்ந்து வேகமாகச் சென்றுள்ளார்.
இதையடுத்து, சுமார் நான்கு கிலோமீற்றர் தூரம் குறித்த முச்சக்கரவண்டியைப் பின்தொடர்ந்த பொலிஸார், நாகொட பகுதியில் வைத்து அதன் மீது துப்பாக்கிப் பிரயோகம் மேற்கொண்டுள்ளனர்.
இதில் காயமடைந்த சாரதி, மேலதிக சிகிச்சைக்காக நாகொட போதனா வைத்தியசாலையில் அனுமதிக்கப்பட்டுள்ளார்.
குறித்த முச்சக்கரவண்டியைச் சோதனையிட்டபோது அதிலிருந்து போதைப்பொருட்கள் கைப்பற்றப்பட்டதாகப் பொலிஸார் தெரிவித்துள்ளனர்.
சம்பவம் தொடர்பில் களுத்துறை பொலிஸார் மேலதிக விசாரணைகளை முன்னெடுத்து வருகின்றனர்.
