உலகில் போர்ச் சூழல் நிலவினாலும் அது நமது மக்களைப் பாதிக்காதவாறு அரசாங்கம் நடவடிக்கை எடுத்துள்ளது!

உலகளவில் பல்வேறு மோதல்களும் பொருளாதார நெருக்கடிகளும் நிலவி வந்தபோதிலும், அவற்றின் தாக்கம் இலங்கையின் சாதாரண மக்களைப் பாதிக்காத வகையில் அரசாங்கம் பாதுகாப்பான நடவடிக்கைகளை முன்னெடுத்துள்ளதாக தொழிலாளர் அமைச்சரும் நிதிப் பிரதி அமைச்சருமான பேராசிரியர் அணில் ஜயந்த தெரிவித்தார்.

திவுலப்பிட்டிய பிரதேசத்தில் நடைபெற்ற “மூத்த பிரஜைகள் வசந்த உதயம்” நிகழ்வில் கலந்துகொண்டு உரையாற்றும்போதே அவர் இவ்வாறு குறிப்பிட்டார்.

நிகழ்வில் உரையாற்றிய அமைச்சர் அணில் ஜயந்த, வயதாகும்போது மனிதனிடம் நற்பண்புகள் இயல்பாகவே கூடுகின்றன எனக் குறிப்பிட்டார். முறைசார்ந்த கல்வியைப் பெறாத போதிலும், மூத்த பிரஜைகள் தமது அனுபவத்தின் மூலம் பெற்றுள்ள அறிவும் ஆற்றலும் தனியாகக் கௌரவிக்கப்பட வேண்டியவை என்றும், இலங்கையில் முதியோர்களை மதித்து கௌரவிக்கும் கலாசாரம் மிக உயர்மட்டத்தில் காணப்படுவதாகவும் அவர் சுட்டிக்காட்டினார்.

அத்துடன், இலங்கை தற்போதைய பொருளாதார நெருக்கடியிலிருந்து வேகமாக மீண்டு வருகிறது என உலக வங்கியே பாராட்டி உறுதிப்படுத்தியுள்ளதாகக் கூறிய அமைச்சர், பல்வேறு சவால்களுக்கு மத்தியிலும் அரசாங்கம் நிர்ணயிக்கப்பட்ட அனைத்து இலக்குகளையும் அடைந்து வெற்றி கண்டுள்ளதாகவும் தெரிவித்தார்.

சர்வதேச ரீதியில் நெருக்கடிகள் உருவெடுக்கும் சந்தர்ப்பங்களில் நாட்டின் அனைத்துத் தரப்பினரும் ஒன்றாக இணைய வேண்டும் என்றும் அவர் வலியுறுத்தினார்.

உலகளவில் போர் மற்றும் மோதல் சூழல்கள் தீவிரமடைந்துள்ள போதிலும், அந்த சர்வதேச நெருக்கடிகள் இலங்கையின் சாதாரண மக்களைப் பாதிக்காதவாறு அரசாங்கம் மிகக் கவனமாகப் பாதுகாப்பளித்து வருகின்றது என்றும், இதனால் உலகளாவிய மோதல்களின் தாக்கம் நமது நாட்டு மக்களுக்குப் பெரியளவில் உணரப்படுவதில்லை என்றும் அவர் தெரிவித்தார்.
மேலும், எதிர்காலத்தில் சர்வதேச ரீதியில் எத்தகைய சவாலான சூழ்நிலை உருவானாலும் அதற்குச் சரியாக முகங்கொடுத்துத் திட்டமிட்டுச் செயற்பட அரசாங்கம் எப்போதும் தயார் நிலையில் இருப்பதாகவும் உறுதியளித்தார்.

சமுதாயத்தில் மிகவும் மகிழ்ச்சியாக இருக்க வேண்டியவர்கள் சிறுவர்களும் முதியோர்களுமே எனக் குறிப்பிட்ட அமைச்சர், கோவிட் பெருந்தொற்று காலத்தில் இத்தாலி போன்ற வளர்ந்த நாடுகளில் அதிகளவில் முதியோர்களே உயிரிழந்த சோகமான வரலாற்றையும் நினைவுகூர்ந்தார்.
எனினும் நமது நாட்டில் அரசாங்கம் முதியோர்களின் பாதுகாப்பு மற்றும் நலன் கருதித் தொடர்ச்சியாகச் செயற்பட்டு வருவதாகவும், வரவிருக்கும் வரவு செலவுத் திட்டத்தில் முதியோருக்கான சிறப்புப் பராமரிப்புப் பொருளாதாரத்தை (Care Economy) உருவாக்குவதற்கான நடவடிக்கைகள் நடைமுறைப்படுத்தப்படும் என்றும் அமைச்சர் தனது உரையில் தெளிவுபடுத்தினார்.