மாகாண சபைத் தேர்தலை உடனடியாக நடத்துவதற்குத் தேவையான அனைத்து நடவடிக்கைகளையும் தொடர்ச்சியாக முன்னெடுப்போம் என்று ஐக்கிய மக்கள் சக்தியின் பொதுச்செயலாளர் ரஞ்சித் மத்தும பண்டார எம்.பி. தெரிவித்தார்.
மாகாண சபைத் தேர்தல் மற்றும் நடப்பு அரசியல் நிலவரங்கள் குறித்து ஊடகங்களுக்குக் கருத்துத் தெரிவிக்கையிலேயே அவர் மேற்கண்டவாறு குறிப்பிட்டார்.
அவர் மேலும் தெரிவிக்கையில்,
“ஐக்கிய மக்கள் சக்தி மதத்தை முதன்மைப்படுத்தி அரசியல் செய்யும் கட்சி அல்ல. எமது கட்சி அனைத்து மதங்களையும் சமமாக மதிக்கும் கட்சி.
நாட்டில் மீண்டும் பிளவுகளை ஏற்படுத்த இந்த அரசு முற்படுகின்றது.
அரசமைப்பின் 13ஆவது திருத்தச் சட்டத்தை முழுமையாக அமுல்படுத்துவதற்கு அவசியமான மாகாண சபை முறைமை தற்போது செயலற்ற நிலையில் உள்ளது.
பல்வேறு தெரிவுக்குழுக்களை அமைப்பதன் மூலம் மாகாண சபைத் தேர்தலை அரசு இழுத்தடிக்க முற்படுகின்றது. தேர்தலை அரசு உடனடியாக நடத்த வேண்டும்.
மேலும், மாகாண சபைத் தேர்தலை வென்றெடுப்பதற்கான எமது கட்சித் தரப்புப் போராட்டங்கள் தொடரும்.” – என்றார்.
