ஐக்கிய மக்கள் சக்தியின் அனைத்து பதவிகளில் இருந்தும் அசோக் அபேசிங்க விலகல்!

முன்னாள் இராஜாங்க அமைச்சர் அசோக் அபேசிங்க, ஐக்கிய மக்கள் சக்தி (SJB) கட்சியின் குருணாகல் தேர்தல் தொகுதிக்கான முதன்மை அமைப்பாளர் பதவியில் இருந்தும், அந்த கட்சியில் தான் வகித்த ஏனைய அனைத்துப் பொறுப்புகளில் இருந்தும் விலகியுள்ளார்.

கட்சியின் பொதுச்செயலாளர் ரஞ்சித் மத்தும பண்டாரவிற்கு அனுப்பியுள்ள கடிதம் ஊடாகவே அவர் இந்த முடிவை அறிவித்துள்ளார்.

அதன்படி, குருணாகல் தேர்தல் தொகுதியின் முதன்மை அமைப்பாளர் பதவியிலிருந்து மட்டுமல்லாது, துணைப் பொதுச்செயலாளர், சமகி தொழிலாளர் சங்கத்தின் தலைவர், எதிர்க்கட்சித் தலைவரின் தொழிற்சங்க ஒருங்கிணைப்புச் செயலாளர் மற்றும் செயற்குழு உறுப்பினர் ஆகிய பதவிகளிலிருந்தும் விலகுவதாக அந்த கடிதத்தில் அவர் குறிப்பிட்டுள்ளார்.

கட்சி தொடங்கப்பட்டதிலிருந்து அதில் இணைந்து செயற்பட்டமை குறித்து மகிழ்ச்சி தெரிவித்துள்ள அவர், கட்சியின் எதிர்கால நடவடிக்கைகளின் வெற்றிக்கும், கட்சியை வெற்றிப் பாதையில் முன்னெடுத்துச் செல்வதற்கு தனது நல்வாழ்த்துகளைத் தெரிவித்துக் கொண்டுள்ளார்.