தமிழகம்- சென்னை நந்தம்பாக்கத்தில் உள்ள தனியார் பாடசாலை ஆண்டு விழாவில் கலந்து கொண்டு உரையாற்றிய இந்தியப் பிரதமர் நரேந்திர மோடி, தமிழ் மொழி மற்றும் மகாகவி பாரதியார் குறித்துப் பெருமிதத்துடன் கருத்துத் தெரிவித்துள்ளார்.
பிரதமர் மோடி பேசுகையில், “பயணம் மேற்கொள்வதன் மூலம் தமிழ் மொழி மீதான என் அன்பு மேலும் மேலும் எனக்குப் பெருகியது.
இந்தியாவை அதிகமாகச் சுற்றிப் பாருங்கள்.
இந்தியாவில் எங்கு சென்றாலும் தமிழ் கலாச்சாரம், கவிதை, மரபுகளைச் சுமந்து செல்லுங்கள், இந்தியா முழுவதும் இருப்பவரிடம் பகிர்ந்துகொள்ளுங்கள்” என அவர் கேட்டுக்கொண்டார்.
தொடர்ந்து பேசிய அவர், தமிழ் இலக்கியத்தின் மகத்தான ஆளுமை மகாகவி பாரதியார் எனக் குறிப்பிட்டார்.
பாரதியாரின் ‘அச்சமில்லை, அச்சமில்லை’ என்ற கவிதை வரியை மேற்கோள் காட்டிய அவர், “பாரதி சொன்னபடி அனைவரும் அச்சமின்றி வாழுங்கள்” எனத் தெரிவித்தார்.
மேலும், தான் காசியின் நாடாளுமன்ற உறுப்பினர் என்றும், காசியில் வாழும் மக்கள் மகாகவி பாரதியாரை இன்றளவும் நினைவுகூர்கின்றனர் என்றும் பிரதமர் மோடி பெருமிதத்துடன் குறிப்பிட்டதாக இந்திய ஊடகங்கள் செய்தி வெளியிட்டுள்ளன.
