இசையமைப்பாளர் அனிருத்திற்கு புதிய திரைப்படமொன்றுக்காக பேசப்பட்டுள்ளதாகக் கூறப்படும் சம்பளம் தொடர்பான தகவல் வெளியாகியுள்ளது.
தமிழ் திரையுலகின் முன்னணி இயக்குநர்களில் ஒருவரான லோகேஷ் கனகராஜ், தனது அடுத்த திரைப்படத்தை இயக்குவதற்கான பணிகளில் ஈடுபட்டு வருகின்றார்.
தெலுங்கு திரையுலகின் முன்னணி நடிகர் அல்லு அர்ஜுன் கதாநாயகனாக நடிக்கும் ‘AA23’ திரைப்படத்தை லோகேஷ் கனகராஜ் இயக்கவுள்ளார்.
அல்லு அர்ஜுனின் 23ஆவது திரைப்படமாக உருவாகும் இதன் முன் தயாரிப்பு பணிகள் தற்போது இடம்பெற்று வருகின்றன. படப்பிடிப்பு விரைவில் ஆரம்பமாகும் என எதிர்பார்க்கப்படுகிறது.
இந்நிலையில், குறித்த திரைப்படத்திற்கு இசையமைப்பாளர் அனிருத் ஒப்பந்தம் செய்யப்பட்டுள்ளதாக தெரிவிக்கப்படுகிறது.
‘AA23’ திரைப்படத்திற்காக அனிருத்திற்கு ரூ.20 கோடி முதல் ரூ.23 கோடி வரையில் சம்பளம் பேசப்பட்டுள்ளதாக தகவல்கள் வெளியாகியுள்ளன.
இது தொடர்பில் அதிகாரப்பூர்வ அறிவிப்பு எதுவும் இதுவரை வெளியாகவில்லை என்ற போதிலும், குறித்த தகவல் தற்போது திரையுலகில் பேசுபொருளாகியுள்ளது.
இந்த தொகை உறுதிப்படுத்தப்பட்டால், இந்திய திரையுலகில் இசையமைப்பாளர் ஒருவருக்கு வழங்கப்படும் அதிகூடிய சம்பளங்களில் ஒன்றாக இது அமையும் என தெரிவிக்கப்படுகிறது.
இதனிடையே, அனிருத் தற்போது பல முன்னணி திரைப்படங்களுக்கு இசையமைத்து வருகின்றார்.
ரஜினிகாந்த் நடிப்பில் உருவாகி வரும் ‘ஜெயிலர் 2’ திரைப்படத்திற்கும் அனிருத் இசையமைத்துள்ளார்.
மேலும் ‘அரசன்’, ‘கிங்’, ‘பாரடைஸ்’ மற்றும் ‘தர்மன்’ உள்ளிட்ட திரைப்படங்களும் அவரது கைவசம் உள்ளன.
அல்லு அர்ஜுன், லோகேஷ் கனகராஜ் மற்றும் அனிருத் ஆகியோர் முதன்முறையாக இணையும் ‘AA23’ திரைப்படம் தொடர்பில் ரசிகர்கள் மத்தியில் ஏற்கனவே அதிக எதிர்பார்ப்பு ஏற்பட்டுள்ளது.
