பிரான்சில் காவலில் இருந்த கைதி ஒருவர் கலாசார சுற்றுப்பயணத்தின் போது தப்பிச் சென்ற சம்பவம் பரபரப்பை ஏற்படுத்திய நிலையில், அவர் பின்னர் செனெகலில் கைது செய்யப்பட்டுள்ளார். கடந்த 13ஆம் திகதி பொதுப் போக்குவரத்தில் பொலிஸ் அதிகாரிகளுடன் பயணித்தபோது, RER A தொடருந்தின் Auber நிலையத்தில் இருந்து தப்பிச் சென்றதாக தெரிவிக்கப்படுகிறது. லூவர் அருங்காட்சியகத்திற்கான விஜயத்தின் போது Nanterre சிறைச்சாலையைச் சேர்ந்த இக்கைதி தப்பியோடியிருந்தார்.
சுமார் பிற்பகல் 2.30 மணியளவில் தொடருந்திலிருந்து இறங்கி மெட்ரோ வழியாக தப்பிய அவர், பொலிஸாரின் முயற்சிகளையும் மீறி தப்பிச் சென்றார். 2001ஆம் ஆண்டு பிறந்த இந்நபர் வீடு உடைத்து திருடுதல் மற்றும் போதைப்பொருள் கடத்தல் குற்றச்சாட்டுகளில் தண்டிக்கப்பட்டு 2028ஆம் ஆண்டு வரை சிறைவாசம் அனுபவித்து வந்தார்.
இந்நிலையில், செனெகலில் கைது செய்யப்பட்ட அவர் தேவையான நடைமுறைகள் பூர்த்தியான பின் விரைவில் பிரெஞ்சு பொலிஸாரிடம் ஒப்படைக்கப்படவுள்ளதாக தெரிவிக்கப்பட்டுள்ளது. சம்பவம் தொடர்பில் Nanterre நீதித்துறை மற்றும் Hauts-de-Seine பொலிஸார் விசாரணைகளை முன்னெடுத்து வருகின்றனர்.
